娛樂滿紛 26FUN - Powered by Discuz! Board

標題: 徘徊於友情與愛情之間........... [打印本頁]

作者: ian2910 時間: 2007-2-13 12:15 AM 標題: 徘徊於友情與愛情之間...........

今日番工,想去暗示自己ge心意比佢知,係做之前,我再探一探佢ge口風........

返到公司,發現原來週圍d同事已經認定我上司同我師妹係一對,又起哄又各樣.........

我唯有在大家面前故作輕鬆,實則心如刀割..........

之後師妹走泥同我講:死啦!而家點收科?搞到全公司都以為佢(指我上司)同我........佢重講笑咁問我情人節係咪會情佢睇戲添呀!呢次真係大劑啦!

我就笑住答佢:唔知你地呀!鬼叫你搞成今日咁ge局面呀?!你又由得人地咁對你,我都無偈個喎!你又唔同人講清楚,人地(指我上司)梗係會誤會左你啦!

(其實我係暗示緊佢應該同我上司澄清佢祇當我上司係玩得埋ge 朋友,佢已經有BF,唔會接受佢......)

咁佢就笑住話:係呀!係呀!我應該話我同你(即本人)先至係真ge!

(我唔知佢係真係聽唔明我意思定係度扮傻!)

之後食lunch,佢同我上司兩個竟然首先行左出去(雖知以往都係等埋大圍人一齊出去食),我扮唔識趣,沖埋出去三個人一齊行,然後我向我上司問:其他人呢?點解佢地仲未跟埋上泥?咁我地去邊度食好?

咁我上司唯有支吾以對:咁我地今日去邊度食好?

三個人慢慢行,於是大隊從後趕上,大家一齊去左一間餐廳度食,埋位個陣,我上司故意坐係師妹旁邊,而我就坐係我上司隔離!

食緊野果陣,我不斷提醒師妹:要戒口唔好食蛋呀!如果唔係你隻手指發炎會更加腫架!

而師妹就同我講:知道啦!我聽你話忍口唔食啦!......

其時,我師妹就拎左一件pizza比我上司,但係就無比我........(不過佢真係唔係幾夠手長!)

其間大家係度吹水,有人講講下就講起我地以前d野,其他人無野講,但係果d經歷,師妹同我就隔住上司就雞啄唔斷......

搞到我上司都同我講,不如我同你換位,等我同師妹可以一齊傾啦!

之後我公司個女副經理就同我上司講:哇你都做到好出面姐!(意指連佢都睇到我上司對我師妹大獻恩勤,係度追緊我師妹!)

我上司即刻故作愕然咁ge樣,好似好無辜咁!..........

我就唔知點解彈出一句:又唔見我咁樣比人笑?我個個朋友就算係女仔,都祇會覺得我係好朋友,因為我係講雷氣(指義氣)ge!

我個副經理即刻好似唔知嗡乜咁講:嘻!講起你就咁樣點得嫁!而家呢個年代慢慢泥點得嫁!要打鐵趁熱呀嘛!

(我估其他人唔明:但係我同我上司應該同時feel到個絃外之音,其實係我個副經理暗示,我同師妹大家拍住做野,之前咁多時間同近水樓台,我應該一早就去追我個師妹云云!)

其實我個副經理咁講,係因為佢知道我介紹我師妹入泥我公司做呢個秘密,而呢個協定係祇有我同個副經理同師妹三個人知!)

聽完我個副經理咁講:我feel到佢說話既含意,好自然咁望左我隔離個上司一眼,點知估唔到佢都咁arm望過泥!我當堂即刻扮到好迷茫............但係我知道大家都feel到有d唔對路.........

而我個師妹就若無其事掛住食..........

食完晏番到公司...........做做下野我師妹同我講佢要飲水食藥,我咪叫佢去囉!

誰不知無幾耐佢沖出泥同我講:死啦!我入去倒水將d藥擺係台面,誰不知我上司竟幫佢數齊d藥丸數量遞比我呀!搞到我而家好驚呀!

呢下搞到我都無言已對...........

然後無幾耐,我上司又週圍同人講要係情人節問我師妹要友情朱古力!搞到全公司d女同事都起哄,而我師妹更加沖出泥好驚青咁係我面前嘈到拆天!!又話佢一定唔會送又話送晒全公司食就無所謂云云..........

雖然佢係咁講,但我個心又涼左一截..........

到左放工,我師妹要去荃灣覆診,我就話我都約左人係荃灣,於是跟埋一齊去,我上司又專豋等埋行左一段路先走............

上左巴士,我同我師妹終於可以靜靜地吹下水

我先撩起我師妹講話我上司點樣撩佢,佢咬牙切齒講左一大輪之後我就同佢講:

其實你咁樣唔係咁好,你上司會以為同你有機會發展,到後來知道你有BF就唔好,分分鐘玩出火hurt到人.

我師妹就話:我覺得佢(指我上司)祇係一個大細路泥姐!佢應該祇係同我玩下之嘛!

跟住我就講:唔係喎!我地男人對男人,都覺得佢會以為係真喎!

咁佢先至話:唔係呀!我之前都有同佢講我有BF嫁!

咁我當堂打個突!原來我上司已經知道師妹有BF,都重要媾佢,証明佢唔介意做人第三者!

我真係有d六神無主!

組織好之後,我再試探佢,我問佢:你今朝番得好遲喎!

佢話:你都知我BF住係長洲嫁啦!我個個禮拜都去見佢你都知格!咁我今招番泥天水圍咪遲左囉!

由佢番去長洲探佢BF,同埋我呢兩個禮拜都無聽到佢個嘈交電話睇泥,佢同佢男友應該和好番,至少暫時係咁!

諗諗下,我發覺佢訓鬼著左......

於是我慢慢咁逼自己冷靜落泥,思考下自己應該點做.........

我係度諗,既然師妹同佢BF暫時好似無番事,我係咪應該唔好再繼續心存幻想,做番我作為一個朋友應做ge事?

我決定暫時都係咁樣做先.........

但係我又擔心,我師妹會把持唔住,終有一日會比我上司得米............

我知道作為第三者既男人,如果要撬人牆腳,一定唔會好明確咁同個女仔表示佢媾緊個女仔,有好多時都懶係玩玩下,而同時會用誠意去打動個女仔,而家我上司就係做緊呢樣野!

我仍然唔知道我自己下一步應該點樣做,我怕我會抱憾終生.......

Please help me!

[ Last edited by ian2910 on 2007-2-13 at 12:21 AM ]

作者: Yi5 時間: 2007-2-13 01:27 AM

假若你好多年之前問過佢而被拒絕咗，而家係時候重新再問一次。假若佢仍然拒絕你，你就應該死心，勉強真係唔會有長遠嘅幸福架!!
拿出勇氣來，但先跟她說不論結果怎樣，希望你們仍會是好朋友，否則可能由好朋友變成十分疏遠的朋友。
祝你好運 !!

作者: specificness 時間: 2007-2-13 11:12 AM

既然你怕抱憾終生，如果我係你，我會考慮這樣做：找一個輕鬆的氣氛、舒服的環境，認真的同佢講：除了是好朋友外，我發現自己已經喜歡了你好一陣子。表明你自己並沒有打算逼她接受自己（尤其是當她與自己男友已經和好），更加不想破壞雙方一直保持著的良好關係，不希望若果對方不接受自己就被迫終止友誼。但同時，誠懇地告訴她，上司的確有意追求，若她沒有意思的話，要小心處理；若她有意思的話，不妨也考慮自己！最後，叫她回想一下這段你喜歡她的日子時雙方的相處，表明：即使自己喜歡你，而你不喜歡我，我也會好像這段日子一樣守護著你、關心你，做你的好朋友，給你意見與支持，希望你不會因為不接受我而連好友也做不成。

這樣就可以表白，並表明自己的立場。如果她堅持因為這樣要跟你疏遠，那她心胸不免不夠廣闊，但若果她這樣才會舒服一點，那也沒有辦法。最起碼，你將想法告訴她了，讓她有一個決定的機會，也令你自己無憾。

作者: angry888 時間: 2007-2-13 12:34 PM

要上就上啦，男人之家咁Q多野諗，成個婆仔咁嘅款，無啲自信，點同人搶。

作者: Teletubbies123 時間: 2007-2-13 01:10 PM

Originally posted by Yi5 at 2007-2-13 01:27 AM:
假若你好多年之前問過佢而被拒絕咗，...

Right. It is because being your good freind is not easy! You think "How many friends (like this type) you have?"If she reject you again, then you should stop this time and don't have any mind on her anymore! In fact, I desire you having such kind of friend!

作者: specificness 時間: 2007-2-13 01:52 PM

Originally posted by angry888 at 2007-2-13 12:34 PM:
要上就上啦，男人之家咁Q多野諗，成個婆仔咁嘅款，無啲自信，點同人搶。

不同意。盲目衝動就很「男人」？不理對方感受就好有「自信」？你的目的只求與別人「搶」？男人不可以多（「q」）啲野諗？各人作風可能不一樣，但以為男人就一定要怎樣怎樣，我就不同意。我倒一直很同情及支持樓主。

作者: angry888 時間: 2007-2-13 02:13 PM

不同意。盲目衝動就很「男人」？
叫佢上唔代表要盲目地上。

不理對方感受就好有「自信」？
Please don't put words into my mouth. I've never made this statement.

你的目的只求與別人「搶」？
佢唔想搶就唔會日日係度呻吟。

男人不可以多（「q」）啲野諗？各人作風可能不一樣，但以為男人就一定要怎樣怎樣，我就不同意。我倒一直很同情及支持樓主。
完全唔值得同情，拖拖拉拉多年，攪到仲要多左個上司同佢搶。

男人唔一定要一個款，不過無自信就會缺乏吸引力。

Once again, please don't make straw man statements to argue with me.

[ Last edited by angry888 on 2007-2-13 at 02:15 PM ]

作者: sakura310 時間: 2007-2-13 02:19 PM

係我睇緊呢篇野ge時候,好似我親歷其境咁,特別係樓主話佢有同上司講佢有BF,我都當堂打左個突

你話我衰都係咁話,如果我係ian你
我會小師妹面前,向佢施加壓力(當然唔好咁出面),叫佢拒絕個上司,當然是以好朋友的身份啦^^
這不等於講你上司壞話yo~
雖然你日後未必可以得到你ge小師妹,但至少唔好為自己增加對手吧~
當然最好想方法疏遠小師妹同你上司,例如你做下電燈膽
又例如係你上司面前有意有意的展示同你小師妹ge密切關係,迫你上司知道,就算佢同佢BF散,都至少仲有你在小師妹身邊
更重要的是,要讓你上司知道,小師妹在有事時,除BF外,首先依靠的是你,而不會因為你上司對佢好而依靠佢
如果小師妹有事依靠左你上司(而你其實係幫到手的)
你一定要跟你小師妹說yo,叫佢唔好可以,因為佢已經有男朋友,這樣做會使你上司誤會的
(雖然我真的不贊成向小師妹施加壓力...)

目前只想到這些,希望幫到你啦^^

作者: angry888 時間: 2007-2-13 02:33 PM

同上司鬥要有搵定工嘅心理準備，不過如果你真係咁鍾意個女仔，值得嘅。

作者: ian2910 時間: 2007-2-15 12:57 AM

琴日我番到公司之前,已經諗好左要點樣做,於是我就嘗試去實行..........

(我同佢係好好既朋友,大家共事左咁耐,佢亦當我係好Close Ge Friend,我唔想忽然間向佢表白而嚇親佢,搞到連friend都無得做)

於是我打算由同佢閒談著手...............試圖提醒佢同佢BF 以經有深厚感情,唔好咁易比我上司動搖到!

一番到公司,我就發覺我上司坐左係我師妹隔離個位度(個位係我坐開ge),而我師妹重未番.....

咁我知道我上司係度等緊我師妹!

我走左埋去,同我上司寒暄兩句就行開左,因為我知我師妹次次都好晏先番到..........

無幾耐我上司就等唔到,因為好多人搵佢,佢番左入去自己位.............

咁我就係自己個位度等緊佢番泥.......

無幾耐我見到我師妹番,不過就唔係平時出入個門口番泥,而係由另一邊側門入,我知道咁行一定會途經我上司個位.........

佢坐埋泥搵隻手拍拍我手臂,然後同我講:頭先阿xx(指我上司)幾衰呀!週圍走去問我同其他女同事要乜野友情朱古力喎!

我就同佢講:哇!咁大獲?你買比佢就一定出事架喎!我一定幫你週圍唱!!

佢就話:唔係!佢週圍都問人要呀!咁都有野,我到時都唔知去邊度搵地方捐..........(跟住就係咁搣我手臂)

我心諗:送朱古力好唔掂!就算係友誼之名,都表示我師妹對我上司幾受落下!

於是大家一齊好似平日咁邊做野邊吹水,咁就又到放Lunch...........

臨放食飯,我見我師妹係寫字樓食,咁我就專豋駛開我上司,夾埋佢一齊出街食...........

食到中途,我就笑住咁同我上司講:其實駛唔駛我幫你做雞仔媒人Jack!

我上司就話:咪傻啦!你都成日亂咁諗野ge!邊係果回事呢?

(係呢度我故作得啖笑就算,因為佢咁講令我好疑惑,究竟佢係真係追緊我師妹,不過驚我爆響口,所以否認?請有心人幫我分析一下!)

食完飯之後番到公司,做做下野,我上司走左出泥同我地兩個吹水............講講下野...佢就同我師妹講:信唔信我挨落你度呀拿!

我師妹就表現到好驚青咁周圍縮.......

而我就故作輕鬆,仲話:呢鋪我一定要拎個手機出泥影相!

兩個人即刻話我乜咁玩野,師妹仲搵本簿扑我個頭............

之後我上司乘機坐左我個位度,係我師妹隔離,不斷咁同我師妹玩,然後仲搵支筆撥我師妹d頭髮............

三條友吹吹下水,我上司忽然叫我行開下,拎d野去第二度做,而我師妹就祇係望住我有d監介咁笑,並無阻止!

咁我故作輕鬆咁去左第二度做,做左一排我出番去,我故意放輕腳步,兩人唔知我係附近聽緊佢地講野!

我聽左一陣,發覺佢地都係講d工作上ge野,無乜特別,於是就現身走左埋去............

而我上司吹多左一陣水,就行開左.........

咁我就坐番埋位,同我師妹講:喂!我今晚落荃灣買朱古力,聽日番泥請大家食!

(因為我師妹住荃灣,我咁講係專豋等自己可以同佢同車,同埋睇下佢對去買朱古力呢件事ge反應......)

果然不出所料,佢話:好呀!我地一齊去買!

於是就咁決定左!

臨放工個陣,我上司又走過泥同我地吹水,其間佢拎左佢自己個身份証比我師妹睇佢年齡,我師妹見到即刻哇一聲:乜原來咁細嫁咋!仲細過我細佬呀!

跟住我地就一齊放工.

行去搭車個陣,我師妹同我上司講:原來你咁後生嫁咋!我咪以後要叫你細佬?

三個人笑左一陣..........

我諗諗下,忽然爆出一句:年齡差咁遠,如果d人結婚咪好難接受??

我上司就講:年齡並唔係一個問題泥ge.....

我無語.......

跟住佢走左,我地行緊去巴士站,我師妹就同我講:估唔到佢咁細個喎!

我心中有數,因為佢份入職Resume係我幫佢交ge!所以我知我師妹大我三年而大我上司八年!

我係度諗緊女仔會唔會接受到咁ge年齡差距.....

而同時,我師妹同我講:成個大細路咁!(指我上司)

我又諗到d野.......

係車度,我笑住同我師妹講:都唔知你地搞乜ge!人叫你買朱古力你就買!因住玩出火hurt到人呀!

我師妹就話:唔會ge!我祇係當佢係一個大細路之嘛!

(我心諗:佢咁講有可能係真ge,因為我師妹大我上司咁多,而且佢對我都好鬼信任,好多事佢都會向我講出泥............但係佢又可能係出於矜持而口不對心!)

希望有人幫我分析一下............

之後我地兩個去左荃灣一齊落車去買朱古力,途中我幫佢拎住件褸同手袋.........等佢唔駛拎咁多野.....

最後我地買左就各自返歸........

作者: ian2910 時間: 2007-2-15 12:57 AM

今日情人節,我拎住盒朱古力返工........

返到公司,做野做到咁上下時間,我同我師妹就先後拎住盒朱古力週圍派............

有幾個女同事送左朱古力比我上司,而我上司就好得戚咁起哄...........

之後我上司摺左兩朵玫瑰比我師妹,而另一個女同事佢就摺左一朵百合比佢.........

之後佢就隨手拎起一粒朱古力,擺落我師妹個口度!(當然隻手掂唔到!)

我當堂好激動,好釆仲識扮野,笑笑口咁大聲講:哇!重要餵埋添呀!點解我無ge?早知我又影張相!

又比我師妹捉住泥鬧,話要鍊死我!

我就笑得衰衰格格咁!其實成個人變晒.........

跟住成日,我就扮到好活躍咁,周圍撩人,但係有d人就同我講我今日有d怪,但係就講唔出..............

之後有人問我:今日情人節,你有無女仔打電話比你先?

我都唔知點解講左一句:我等ge電話永遠唔會打泥...........(眾人有d諤言)

食完飯之後整個下晝我都有d神不守舍,連我師妹都留意到..........

佢就同我講:駛唔駛我介紹個friend比你?

我話唔駛啦!

之後又有一排係度忙緊,而我就歇力擠出笑容,係度搞笑..........我師妹笑到標晒眼水好開心!

之後吹吹下水,我乘機問下佢:其實你接唔接受到忘年戀呢家野?

佢就好激動咁話:梗係唔會!好似帶住個小朋友咁!諗起都唔掂!(我唔知佢咁答係咪真)

我留意左好耐,先醒起佢間唔鐘都拎起個兩朵花泥玩.................

之後收工,佢話要去商場買d野,我就陪佢去............

行行下,佢問我可唔可以幫佢保管兩朵花,佢話佢今晚要約佢男友........

我梗係話唔可以啦,重話驚整鬼爛d花,跟住佢諗諗下又係,於是就自己拎番......

我就成機同佢講:有乜問題?比BF見到咪見到,你又話友情之花,咪話d同事玩姐咁LAW!

佢就話:我驚此地無銀咋!

咁我笑左一下胡混過去..........

跟住我地走,佢問我會去邊,我咪話返屋企囉!

咁佢笑住話:我點知Jack!我見你成日去深水步,我唔知你今次係返屋企定去深水步呀嘛!

我就話:深水步我都已經行到爛啦,仲日日去,你估我係電車男咩!御宅族呀!

佢笑到反艇...........好激動咁同我講:我最憎電車男架啦!乜都唔夠膽!不如死左佢啦!假如見工都係咁,邊個會請呀!

(我有d懷疑,唔通佢講緊我?係度試探緊我反應?定係一時講起姐?我唔敢肯定,但係我表情掩飾得好好,一d破碇都無............)

其實我心裡面係度叫緊:如果你係專豋暗示比我聽ge,我可以話你知:我有我ge苦衷你知唔知?我唔可以去愛一個有BF既人,我無法開口........我曾經決意唔做第三者,縱然我幾唔願意都好,我無法違背我自己ge宗教信仰.......

知你有BF,我有幾難過,用幾多時間我先至將佢轉化為友誼?你之前同BF嘈大交,我曾經閃過一絲希望,但係你而家好似和局好返,我本應叫自己唔好諗太多,唔好再幻想,疊埋心水做你好知己!

心如止水,但係比我上司咁樣一搞,我真係無法忍受!

給我一個答案:至少結果如何,對我泥講都係解脫!

我仍然係度等緊!

大家各自等車個陣,我同佢坐左係度,佢拎住兩朵花,望住係度甜笑,我問佢:

如果佢真係摺金莎紙花比你,你會唔會收?如果係收,咁就大件事啦!

佢就話:d包裝紙都爛晒啦!佢摺唔到啦!

咁我有少少堅持:如果佢真係送比你一個呢?咁就係人都知道乜野事啦!

佢就話:咁咪由得佢囉!

我話:由得佢?咁佢會繼續啦喎!

佢話:咁我有權拒絕家嘛!

(我心諗:有權拒絕,會唔會等於表示唔肯定ge意思?)

跟住佢就上左車,我亦都搭車返泥屋企..

今晚,係滿腦疑問ge一晚!

作者: ian2910 時間: 2007-2-15 01:02 AM

我而家做緊既,係用我好朋友身份,探聽師妹同佢現任男友關係係咪已經和好番,同埋佢對我上司係咪有feel!如果佢同佢現任BF已經和好左,我就會規嚾佢唔好泥足深陷!希望比壓力佢Ban我上司.................

唔知咁做可唔可行?而家做泥唔泥得切?請大家幫我分析一下............

作者: pc20001103b 時間: 2007-2-15 12:35 PM

Originally posted by ian2910 at 2007-2-15 01:02:
我而家做緊既,係用我好朋友身份,探聽...

你做呢d野究竟真係為佢好定係想少個對手,等自己多d機會?
你諗清楚先

前者既,我無話可說
後者既話,配合埋你之前探佢口風咁鬼祟
我個人就覺得好反感
無謂將自己包裝得咁偉大

當然,我唔希望你係後者啦

[ Last edited by pc20001103b on 2007-2-15 at 12:40 PM ]

作者: sakura310 時間: 2007-2-15 05:15 PM

「食到中途,我就笑住咁同我上司講:其實駛唔駛我幫你做雞仔媒人Jack!
我上司就話:咪傻啦!你都成日亂咁諗野ge!邊係果回事呢?」

呢度我諗
如果你上司對你小師妹無野,我諗佢唔會好似上面咁答lor
佢咁答,"咪傻啦"已經表示左佢知你同佢講緊佢同小師妹d野,而佢都知道大家都認為佢同師妹有d野,而佢從來無避忌過,(先不管真假)但佢又唔認為係哥回事wor,所以佢先話你成日亂諗野
我會覺得係佢唔想你插手
而且我覺得佢而家都同你一樣處理觀察的階段,唔單止觀察小師妹,仲有你
講真,你同小師妹咁熟,想追小師妹,搵你搭路肯定方便快捷
但佢無咁做,一來可能佢真係觀察緊你係咪真係會幫到佢追小師妹,二來佢可能認為你會對佢造成阻礙

而且我覺得應該再問落去
例如...
我:"但我覺得你對人好似有d野wor"
司:"邊個呀"
我:"你而家成日搵多最多哥個呢~"(<=要你上司講出口,唔係你講小師妹出口,不然會俾佢一口否認)
...
..
.

唉~我這樣說好像真的說到你上司是個壞人似的><
大概是因為我是個會計算人的人,所以是會壞心眼一點,所以我的意見,真係意見,免得日後你得罪上司走來怪我可不行啊

其實睇左咁多你寫GE野,我真的相信你上司對你小師妹有D野,但因動機未明,所以唔肯定話佢想追你小師妹

又摺花,又餵食朱古力(睇到呢度我差點激動到拍枱加爆粗)
講真,如果係兩個女GE,我會覺得無咩所謂,因為女仔間的友情可以好有趣
但男同女啦WOR,我就真係覺得有d過分
你會唔會對你小師妹做d咁ge野呢?
如果繼續我上面的胡思亂想,我會覺得係你上司有意無意的向你示威
如果男餵女,我只會諗到幾種情況,一係亞哥餵亞妹食野,一係情侶,仲有就係知己
你上司細過小師妹,你小師妹都話當佢大細路,而且,從你的文中我看不出你上司照顧小師妹,所以這個不成立
如果係情侶,這就是耍花槍,可能佢想睇下師妹受唔受,或者想加深and鞏固佢地ge感情(不知是哪種感情yo)
如果係知己,咁同兩個女ge無咩分別,或許你上司是xx的 XD
如果這是合理的行為,大概他們的關係和感情已經超過你跟小師妹的吧...
但我可不是這樣認為,因為小師妹好像沒怎麼把你上司放在心上(大細路...)
問題是你小師妹今次完全的受左,沒有任何反抗,唉~這怎不叫你抓狂

「之後吹吹下水,我乘機問下佢:其實你接唔接受到忘年戀呢家野?
佢就好激動咁話:梗係唔會!好似帶住個小朋友咁!諗起都唔掂!(我唔知佢咁答係咪真)」

唔知係咩情況答呢?係旁若無人咁自然咁講定係細細聲咁講?
我覺得應該要留意當時小師妹的表情,係咪哥種好怕俾識ge人(辦公室的人)聽到哥種"動靜"
如果係呢種"動靜",這可能表示小師妹一來怕俾說話傳到上司耳中,二來怕怎樣回答都會俾其他人誤會而家佢同上司的關係(但我卻覺得小師妹不會這樣做)
大概是好似平時咁講,就算俾人聽到都無所謂,因為佢唔認為佢同你上司會有結果
所以我覺得佢講ge係真的,應該不會是為了掩人耳目而說的

咁女仔收到人地咁有心思摺俾佢ge花,咁開心下,得閒lor出黎玩下都好正常ge
而且之後佢都想將花俾你,驚佢男朋友誤會
但這是不是意味著佢同你上司d野,佢男朋友係唔知ge呢?

不過呢~我覺得應該打蛇隨上,下次再遇到呢d情況(小師妹話此地無銀)
你回佢:"你無心,當人大細路je,人地唔知係咪咁諗"
又或者:"既然你驚你男朋友誤會,你就唔好再令人(上司)誤會啦"(<==這樣算不算規勸?)

「好激動咁同我講:我最憎電車男架啦!乜都唔夠膽!不如死左佢啦!假如見工都係咁,邊個會請呀!」
咁呢度我又覺得你多心左少少ge
事實而家你有工做緊,即係有人請啦 haha

唉~雖然唔想講,但都係講講好
小師妹說"有權拒絕"
即係話小師妹有選擇的餘地,這是不是意味住小師妹可能會接受你上司?!
唉~看來是我想太多了...

作者: rexpliskin 時間: 2007-2-24 03:27 PM

真金不怕紅爐火!!!!!!!!!!!!

作者: rexpliskin 時間: 2007-2-24 03:27 PM

我支持你!!!!

歡迎光臨娛樂滿紛 26FUN (http://26fun.com./bbs/)