娛樂滿紛 26FUN - Powered by Discuz! Board

標題: [轉貼] 萬聖節陰靈當道撞鬼話咁易 [打印本頁]

作者: new_hp 時間: 2007-2-20 11:35 PM 標題: [轉貼] 萬聖節陰靈當道撞鬼話咁易

萬聖節陰靈當道撞鬼話咁易
萬聖節原名屬陰節，係游牧民族凱爾特人對黑暗世界死亡之神既敬拜節日，同中國既盂蘭節一樣，是日鬼門關大開，群魔亂舞。想見鬼，萬聖節絕對係最適合既時機。點樣可以見鬼？其實都可以分先天同後天兩種架！

先天見鬼額短留陰
如果你額頭生得低，頭髮蓋著正額，你就經已擁有見鬼先天條件第一項。假如你口唇周圍有深色黑邊，唇色又不夠鮮，猛鬼就隨時係你身邊。若再加上眼神冇焦點，額角冇光澤，眉間印堂出現青色，仲要大細眼得非常明顯，眼球顏色偏淺又亂戴有色隱形眼鏡，咁就肯定會出事。此外，睫毛長而直、眉又粗又濃、耳仔尖尖既朋友，亦非常容易見鬼。如果你有齊或大部分上述既見鬼先天條件的話，咁你平日應該已經見唔少鬼怪，甚至屋企入面，都可能有幾隻鬼住緊既身邊。

穿紅穿黑最易惹鬼
後天方面，如果你特登要見鬼的話，唔使三更半夜削蘋果或者用牛眼淚搽眼咁麻煩。記得去夜街既時候，多D黑色同紅色衣物，黑黑沉沉，鬼怪自然喜歡依附。而紅色對鬼怪來說，係種特別兼標奇立異既顏色，著住呢兩種色既衫行近牆邊，鬼怪自然會留意到你，即時出黎同你打招呼。

想要見鬼不停講鬼
要見鬼，當然要成日將個鬼字放係口邊，例如「你個衰鬼」、「撞鬼你呀」、「鬼火咁靚」等。唔少人為左加強語氣，說話既時候都會加個鬼字，想見鬼當然亦要成日講住個「鬼」字啦！「衰鬼、臭鬼、死鬼、鬼上身、見鬼……」總之，不停咁講個「鬼」字，因為聲音既磁場係可以觸動鬼怪，令佢地以為你想約佢飲茶，收到 Call咪出黎現身同你做個朋友囉！

郊外陰森極易撞鬼
萬聖節成班人扮鬼扮馬，係中環或者尖沙咀呢D咁多人既地方，陽氣咁重，點樣撞鬼呢？要撞鬼梗係去郊外玩啦！郊外四野無人，而且濕氣重，仲有唔少野生動物死既郊野公園內，屍體在此腐化，因而陰氣極重，強化左負面磁場。一個人乜都唔戴，玉同十字架都放係屋企，隻身走去郊外搵鬼，夠薑既話，保證你猛鬼纏身。

長長走廊好易請鬼
唔想去到郊外咁遠撞鬼，咁就要去舊區重建既屋村啦！大家都知舊式屋村，一條長走廊，門對門，好不熱鬧，為左改善居住環境，呢種舊式屋村經已開始清拆，但係仲有唔少依然未動工。屋村人去樓空，冇水冇電，長長走廊不見陽光，造成陰盛陽衰既情況，係鬼怪最愛匿藏既天堂。一班人係長而冇燈光照明既走廊玩碟仙、筆仙，直接請鬼上陽間，與靈體接觸，咁就百分之一百可以撞鬼架，萬聖節係外國節日，不妨試用西洋碟仙，可能會快D請到鬼上人間黎！

二五尾房至易藏鬼
人生路不熟，撞鬼就最容易，揀酒店記得一定要揀尾房，因為日照不足，欠缺陽氣，靈體至鍾意匿埋係呢D地方。如果房入面仲有打開左聖經同佛經，咁就更加恭喜你，夜晚可能好唔得閒，大把鬼朋友招呼你。冇尾房住亦唔緊要，你可以要求住有「2」同「5」兩個數字既房間，最理想當然係住「2525」號房啦，因為「2」同「5」都屬於有靈性既數字，特別容易吸引靈體注意，時運低既朋友，保證可以過一個恐怖過《奪命狂呼》既萬聖節。

多謝閱讀。
如果您認為這主題文章有價值或對您有幫助，請給個回覆以作支持。
這樣我才有動力去找更好的話題給各位分享

歡迎光臨娛樂滿紛 26FUN (http://26fun.com./bbs/)