娛樂滿紛 26FUN - Powered by Discuz! Board

標題: 老羅真有眼光 [打印本頁]

作者: mhkk 時間: 2008-3-21 03:55 AM 標題: 老羅真有眼光

老羅真有眼光

本月初洛杉磯銀河訪港鬥南華前，南華足主羅傑承曾露口風話五月底將舉辦外隊表演賽，仲會係雙料娛樂，經過連日聯絡，有關外隊已到落實階段，由於祖記叫價甚高好難傾得成，南華將一次過搵兩支英超隊來港交手，首選為熱刺，再於曼城及紐卡素當中揀一隊，又以曼城優先，由於戲金唔貴及贊助踴躍，票價有機會平過去年巴克萊亞洲錦標賽，總之各位球迷，到時準備撲飛啦！

紐卡素訪港機會微
香港球迷始終鍾意睇英超，所以南華搞表演賽，搵英超球隊係好正路，而且熱刺同曼城都唔受今夏歐國盃影響，大部分主力都能隨隊東來，包括熱刺最孭飛球星貝碧托夫、羅比堅尼、艾朗連儂、活基治同羅賓遜，而曼城亦會由領隊艾歷臣領軍東訪，至於聯絡中嘅紐卡素，三年前曾來港，球隊近況亦不佳，來港機會較低。

南華一開二踢頭尾場
南華搞比賽肯定有新花款，今次當然要玩盡佢，就係由南華兵分兩路，分頭尾場同時迎戰兩隊，屆將以曼城踢頭場，熱刺壓軸，頭場對曼城之戰嘅人腳，有機會係今年連奪省港盃同賀歲盃、曾經同羅生合作過嘅部分港聯成員，當然，該支港聯嘅南華主力，就會留力尾場迎戰熱刺，雖則話係南華分戰兩隊英超，但實際上係搵齊全港精銳幫手，肯定夠晒熱鬧。

暫定5．22踢夜波
比賽日期原定為五月廿五日周日踢日波，但近期傳出消息話會推前三日，在五月廿二日周四在大球場踢夜波，原因係英格蘭國家隊宣布在五月廿四日集合球員踢熱身賽，為避免有國腳被徵召，將表演賽推前是最佳方法。

不過，熱刺訪港有一個最大障礙，就係該隊贊助商係一間外國博彩公司，由於香港法例禁止外國博彩公司作任何形式宣傳，屆時熱刺嘅主要贊助商唔可以在港出現，呢個問題有待同熱刺方面協商解決。

雙料娛樂益球迷
足總唔會Say No啫？

南華入信足總申請一日內辦兩支外隊，得益肯定係球迷，但卻受到唔少阻力，足總指此舉並無先例可循，所以日內要召開特別董事會，睇下班董事嘅意見係點，畀唔畀搞。

有待足總通過
除咗足總自己搞嘅比賽如賀歲盃，可以一次過邀請一支以上外隊訪港之外，甲組會以往並未試過咁做，最多都係同其他甲組會拍檔，先至搞得成外隊雙料娛樂，在今次事件中，足總曾建議南華搵甲組會幫手，不過羅傑承認為自己球會搞得掂，就無謂騷擾人哋，所以一切要睇個特別董事會點判。

羅生坦言：「今時今日搞比賽，如果冇橋冇新意，球迷根本唔會有興趣來捧場，如果淨係請一隊來，球迷覺得短癮唔夠喉，就未必入場，我做咁多嘢，都係想搞旺個市，所以希望足總能因應形勢，將部分不合時宜嘅條例廢除，畀更多空間甲組會發展。」

作者: 小妖 時間: 2008-3-21 10:51 AM

羅生好野！

作者: bigfish 時間: 2008-3-22 12:23 AM

羅生成日都空口講白話, 好似請日本國腳件事咁, 有炒新聞宣傳球會之嫌, 其實根本冇打算請強援

作者: athkabd 時間: 2008-3-22 01:59 AM

有咩理由自己就得而唔俾人搞? 難得有人肯出錢出力搞旺球市, 班友就咪阻頭阻勢啦

作者: freeze0912 時間: 2008-3-22 06:10 PM

如果真係俾南華搞
足總驚遲d香港人只識南華而唔識香港足總
講黎講去足總都係只為自己....
唉.....

作者: ronald001120 時間: 2008-3-22 08:23 PM

一日兩場
會唔會大想頭左D
放個位畀第2隊搞la

歡迎光臨娛樂滿紛 26FUN (http://26fun.com./bbs/)