娛樂滿紛 26FUN - Powered by Discuz! Board

標題: 2000年的真人真事 (同鬼同居) [打印本頁]

作者: morikanekkk 時間: 2008-4-21 09:46 PM 標題: 2000年的真人真事 (同鬼同居)

大約係2000年發生的...

由細到大我都係同屋企人住某區嘅警察已婚宿舍 , 住左近10年一直都相安無事 , 因爸爸已差不多到達退休年齡 , 所以我們一家亦提早搬遷到新屋 , 再過了2年因方便工作關係 , 我獨自搬回舊屋 (某區嘅警察已婚宿舍) 住 , 怪事就開始發生喇...

搬返去嘅第一晚 , 因為剩得自己一個人所以都有小小驚 , 又怕黑 , 所以就係廳度同朋友煲電話粥 , 傾到眼瞓就係廳瞓著左喇 . (因為怕黑所以厠所燈一直開住)

瞓到中途我聽到有幾把聲係我耳邊傾計 , 有男有女 , 大聲到將我嘈醒左 ~
當我張開眼時聲音就由大到細咁消失左 , 而同時...我亦發覺全身郁唔到 ~
呢一次係我一生人第一次感受到比鬼壓...
我記得我瞓個位置係啱啱望到個鐘 , 當時時間係零晨4:30 左右 ~
我個心不停諗...點算好呀...仲有個幾鐘先天光...我今晚點過...
不知不覺中我又瞓著左...

怪事持續都係每晚4點幾就發生 , 漸漸我都已經有習慣左喇 ~
直至有一次同同事講開我嘅怪事...其中一位同事係我同年出世嘅堂細佬 ~
佢就提意不如佢黎我屋企住當陪下我 (其實佢都係想返工方便d,同埋又可以過下d唔洗比屋企人煩嘅生活)
(第一晚) 佢一入屋就大大聲話 “我就唔信有鬼喇 , 有本事就黎壓我啦”
當日佢都係瞓廳嘅梳化 , 我一張 , 佢一張 ~
第二朝 , 佢話返比我知佢當晚真係比野壓 , 反而我就好神奇地當晚一d事都無...無再比野壓...
由於我細佬比鬼壓過都依然唔係好信~
佢話”可能因為瞓梳化,瞓得唔好有機會壓到神經線,有錯覺誤解為比鬼壓”
於是細佬決定黎多次~

(第二晚) 佢選擇瞓房...但結果都係一樣 ~

(連續幾晚) 佢都選擇左唔同嘅房 , 唔同嘅位置 , 就連地下都瞓過 , 但結果都係...
細佬無法唔信喇 , 於是佢打電話同佢媽咪講左成件事 , 佢媽咪即刻求左d”附”比佢放係身度保平安 ~
一向唔信鬼神嘅細佬都乖乖地將度”附”吊係頸鏈先瞓~
好好彩~第二朝起身細佬已經無再比鬼壓 , 但條頸鏈就離奇地斷左跌左落地度...

呢件事可能係因為間屋無人住果時比d靈界朋友入侵左...

歡迎光臨娛樂滿紛 26FUN (http://26fun.com./bbs/)