剛出籠嘅人口政策諮詢文件顯示本港婦女生育率低，平均生育一點二個嬰兒，更有機構發現本港住屋條件差，港人「性空間」不足，立法會議員蔣麗芸（Ann）尋日就拋出極創意建議，指若政府容許民間開多啲時鐘酒店，有助市民「開房」，咁咪容易「造人」囉！
倡增發時鐘酒店牌
蔣麗芸尋日同傳媒聚會時就討論到呢個問題，話去時鐘酒店「開房」就可以確保有足夠空間，當佢知道開房勝地九龍塘理想酒店都因為不敵地產霸權無奈結業時，就話佢嘅九龍西選區內有唔少時鐘酒店，當中尤以佐敦區最多。佢更建議，政府倒不如向部分無牌經營嘅時鐘酒店發出正式牌照，等年輕人可以光明正大地光顧時鐘酒店「造人」，從而增加生育率喎。

發表完增加生育率嘅偉論後，阿Ann又大嘆，有啲夫婦因為養小朋友太貴而決定唔生，於是又向政府獻計，建議推行「嬰兒基金」。佢構思嘅「嬰兒基金」係幫小朋友由出世嗰日起儲錢，新年時逗嘅利是要統統放晒落基金，而政府就會向小朋友「發債」，徵用佢哋嘅利是錢作為興建隧道同商場嘅資金，令小朋友成為政府嘅債主。

佢之後愈講愈起勁，話橫掂小朋友大個之後都會用到以上嘅設施，政府咁做可以話係「為孩子們的未來而設」喎！阿Ann話呢啲構思已經喺佢腦海中形成一段時間，待時機成熟後就會向政府提出建議。唔知大家又點睇呢？