1999年，娛樂圈有一單「鄔公奇案」，97年港姐冠軍翁嘉穗與同屆亞軍李明慧(季軍係佘詩曼)一齊爭七海化工老闆鄔友正，最離奇係，98年6月李明慧宣布同鄔友正結婚，但未幾又突然爆出翁嘉穗情傾鄔友正。最後翁嘉穗於99年1月同鄔生喺拉斯維加斯註冊結婚，努力「造人」，00年更一索得子組幸福家庭。

轉眼就15年，囝囝都讀中學，計下條數鄔友正都六十幾；而已屆41歲嘅翁嘉穗，將再為人母，呢胎都係仔，六月開刀生B，屆時屋企有三條King，陽氣好旺盛喎!

今日翁嘉穗以贊助商身份，挺住六個月身孕，到天際萬豪酒店出席李敏鎬個唱記者會，幸福滿瀉。事後翁接受《蘋果》訪問時謂:「有咗六個幾月，鍾意小朋友呀嘛(係計劃定意外？)隨緣啦。呢胎陀得唔辛苦，重咗十幾磅左右，依排休息多啲，不過今晚都會去睇李敏鎬個演唱會。之前我仲陀住佢去聽《The Phantom of the Opera》，佢好似幾鍾意聽音樂咁0架。」

翁嘉穗又笑言每次食嘢嗰陣，BB喺肚裡面都會係咁踢佢，特別係食西餐嗰陣。「我食pasta嗰陣，佢好大反應，可能我平時食得中餐多啦。」

待產嘅翁嘉穗家陣除咗休息，亦有做運動如游水咁。隔咗15年先至陀第二胎，屋企人自然好開心，而且三條King屋企陽氣更盛。翁嘉穗謂因為第一胎係開刀生，故呢胎都會選擇開刀。