Board logo

標題: 我的故事（下集）[卡+] [打印本頁]
作者: attaboy    時間: 2005-9-15 09:08 PM     標題: 我的故事（下集）[卡+]

第二戀遲遲未發表，一來事忙，二來這戀回憶起來確是苦多過甜，自己平時絕少去觸及．但在此答應過會發表，加上 JCer 及 yungting0623 兩位的期待，只好硬著頭皮將自己的失敗經驗公開．先此聲明，由於現在剛投入另一工作，時忙時閒，故可能有短暫脫稿之情況，萬望包涵．Anyway, here we go.

......續第一戀

返到香港，經舊同學介紹，入咗一間法蘭西 IT 公司做野．呢份工實在冇得頂：人工滿意，工時自由，同事大部份外國回流，就算我癲起上黎佢地都較易接受，間唔中又有 trip 出，簡直係夢寐以求（第一份黎講）．返工第一個月，我已經同大部份同事打好關係（大公司人流快，好多 freash graduates 同時入呢間公司，後生仔女好快傾埋玩埋）．第二個月有一日，下晝做做下野，突然好多男同時走埋一齊，望住 Conference Room 個門口，心諗唔通公司福利好成咁，返工時間請阿 Twins 黎做 live show 獎勵員工，由於新返工，重未有好多 workload，所以就走去 reception desk 向金母（人名，洋名中譯，下同）了解一下（即係去八卦下）．哦，原來有個靚女黎 interview，怪不得知咁墟冚．但本人由於對靚女不嬲既感覺（尤其人品）都好麻麻，所以都唔係太上心．過冇耐，阿金母同我講，靚女己被取錄，過多一個月就會成為我隔離 team 既同事，而我個 team 好多時都要同隔離 team 合作既，當時我就希望千祈咪要同佢合作，因為 attaboy law 係：靚女唔做得野，做得野既就唔靚．我想全心投入工作，靚女？咪搞我！可惜，我空有如此主觀意願，始終都係偏偏選中我......

[ Last edited by Rika on 2005-9-22 at 05:34 PM ]
作者: Rika    時間: 2005-9-15 10:07 PM

幾好彩喎，你就好啦，公司安排埋個靚女比你~ go on~
作者: attaboy    時間: 2005-9-15 11:32 PM

Originally posted by Rika at 2005-9-16 12:07 AM:
幾好彩喎，你就好啦，公司安排埋個靚女比你~ go on~
最初都以為係，但係......唉......睇埋落去就會知靚女的確係難服侍（至少我自己就無咁既本事）．佢令我對女仔既諗法做法有好深既認識同體會．呢一次算係我人生上趺得最重既一跤，雖然最後我要用一個不太被世俗道德所接受既方法去忘記佢，但係呢一跌對我愛情路上既成長係有好大幫助．得一失一，這就是人生．
作者: attaboy    時間: 2005-9-17 06:09 PM

......續前

自從阿靚女黎 In 之後，公司既男同事都好似係度倒數緊佢返工既日子．雖則我間係 IT 公司，本來以男職員為主，但係由於係鬼子老公司兼且o係外國有o的名堂，所以好似男女同事比例都有晒 Policy，保持 70/30，有三成係女同事咁上下．公司唔係冇女同事丫，班男同事駛唔駛好似去好景買四仔o的麻甩佬咁，流晒口水成日提住阿靚女？其中有個話佢似楊千嬅......呢o的我都聽過就算，由得佢地發白日綺夢．過咗一個月，o個日唔記得一號風定黑雨，我十點零返到公司，見大部份同事都冇返（或未返），埋位清下手上o既o野，突然阿同事珍妮花行埋o黎，同我講：呢位係新同事 Melody ．（我公司係有個新同事行大運o既規矩，呢o的我兩個月前己經試過o勒）望下珍妮花隔離，企咗一位高高瘦瘦，頭髮長長，斯斯文文o既女仔．當時我諗，呢位就應該係傳聞中o既楊千嬅o勒．Hm，都算係靚女o既，不過唔係太似阿千化，只係對眼有o的似o即．睇佢個樣驚驚青青，成個小家碧玉初見世面咁o既款，祝你好運啦，公司o的男同事（尤其 Senior o個o的）有時玩人都玩得幾過份，希望佢能幸免啦．到咗食晏，由於當時公司位於港島南部一個李家天下o既半島，相當隔涉，所以公司係有免費飯盒供應o既．通常食完晏，我地一班熟o既同事，會撘 Shuttle Bus 出去 Shopping Centre 食糖水．o個日我如常問同 Team o既女同事 Didi 出唔出去，佢話不如問埋 Melody，我話咁你去問啦．係呢度一定要介紹下 Didi，佢對我呢段苦戀所知甚詳，亦出力唔少，係呢段戀入面唯一開心o既係能同 Didi 成為好朋友．Didi 比我遲一個月入呢間公司，但係年紀就大我兩年（同我親生家姐一樣，所以我都當佢係家姐咁），佢比我早兩年出o黎做o野．由於 Didi 岩岩返工時，我老細唔得閒，叫我幫手帶佢，教佢做野（雖則我個時都係做咗一個月，但係我老細好似己經幾信任我o勒），由於咁o既關係，我同 Didi 就變得好熟絡，Didi 對我亦好信任，覺得我個人唔錯，連佢過多一年就會結婚都同我講，當時係公司除咗兩三個女同事之外係冇人知o既（呢點我當時唔知，後來 Didi 結婚時我先知）．話說回來，Didi 問完 Melody 返黎同我講話 Melody 都去喎．咁一班人就係咁去咗食糖水．呢次糖水之旅，算係首次真正認識 Melody，席間，只見佢默默食糖水，低首不語，好似好怕醜咁．間唔中男事們講下笑話，佢就自己o係度傻笑，但係由頭到尾都冇出過聲，當時佢畀我既感覺係一位斯文怕醜到不得了o既女仔，後來識耐咗亦發覺佢o既性格真係楚楚可憐o個隻，從來冇見過佢會大聲同人講o野．我個人最怕係一o的港式師奶型o既女仔，成日咇咧爸啦，買野奉旨講價，得閒無事四圍八卦，得罪佢地就當你係殺父仇人咁追住o黎打......呢o的 Meldoy 都好似冇，令我對佢既戒心（由於靚女關係）一點一點咁抺去，亦令我慢慢行咗去一條唔應該行既愛情路......

[ Last edited by attaboy on 2005-9-17 at 08:10 PM ]
作者: edifier    時間: 2005-9-18 12:31 AM

希望你可以繼寫出你的故事,雖然斷斷續續,但都支持你繼續寫落去!
作者: yungting0623    時間: 2005-9-19 01:48 AM

期待...........
作者: attaboy    時間: 2005-9-19 11:51 PM

......續前

食完糖水返公司，見到同 team 個 senior 雷蒙返咗黎．雷蒙係我個 team 做得最耐既人，個 team o的o野佢就最熟o既，好多時就連我老細都唔夠佢熟，有o野唔明都要問佢，所以雷蒙成日都擺出一副老臣子姿態，即係扮晒老細款，用好差o既態度點人做o野．而我老細亦無可奈何由得佢，因為重旨意佢幫手．而亦由於做得耐o既關係，公司上上下下同佢都好熟，雷蒙係o個種成日口花花撩女同事o既人，但係就幾 tum 得下人，所以大部份女同事都唔介意兼且會回翻佢幾句．而呢位雷先生就成為公司裡面中 Melody 招o既第一人o勒．由於我坐個位係對住 Melody 個窗口，見到晒佢o既一擧一動．（Meldoy 成 Team 人當時全部坐o係一間細房入面，Melody 就坐正o係個窗口位度）冇幾耐，雷蒙開始o黎料o勒，周不時借故走埋我個位度扮同我傾公事，但就眼都唔眨咁望住 Melody 坐o既方向，重係度自言自語：呢次我死啦，我死啦！講o既時候笑口淫淫，樣極陶醉，成個雨夜屠夫咁o既格局，明眼人都知佢想打 Melody 主意啦．佢重同我講：attaboy，以前都唔覺你個位咁正，不如我地調位呀？我心諗：吓，駛唔駛咁猴擒呀？不如你申請埋調去 Melody 個 Team 坐係佢隔離丫笨！口講話：你鍾意啦！雷蒙當然冇咁做到，但係就做咗好多奇怪擧動．例如冇啦啦請成 team 食 Tea，重請埋 Melody 個 team．據o的做得耐o既同事講，雷蒙做咗咁耐只係萬過一次 tea 歲，就係之前佢 last day o個日（雷蒙曾經辭過職，跳過糟，後來我老細空降落我個 team in charge，對 team o的野唔知頭唔知路，搞唔掂搵呀雷蒙返黎幫手，由是之故，雷蒙便當個 team 冇咗佢唔得，囂張自恃，每日唔過 11 點都唔見佢返工)呢個 Playboy 雷蒙，呢次似乎真係「招ed」，居然都識怕醜，唔敢走去問 Melody 個 tea 要叫的乜，駛我呢個唔關事o既人去問佢！好啦，問就問．我拿住張 tea 紙，走埋 Melody 個位同佢講：小姐，阿雷蒙仔話今日請大家食 tea，你想要乜呢？見佢依然係好驚青，好似o野都唔敢講咁，我就話：不如你要乜寫低o係張 tea 紙度啦！遞張紙畀佢，見佢寫咗一隻字，空一個格，又寫多一隻字，但就望住張紙，好似冇意欲畀返我喎．我問佢，寫完未呢？我重要問其他人架．佢好唔好意思，用柔弱既聲線話：我想要凍檸荼，但係唔記得個「檸」字點寫呀！唔係呱，阿靚女，唔係靚就唔駛識字o架！＜－－呢的係心諗，口同佢講：唔識寫，寫個「０」字就得啦，茶餐廰o的夥記都係咁落單o既．佢用好感激o既眼神望住我，好似幫咗佢一個好大o既忙咁．而佢對我o既好感似乎亦始開始建立o勒......
作者: edifier    時間: 2005-9-20 10:48 AM

好! 支持你繼續寫落去! 好似睇劇集咁追落去!
作者: dom    時間: 2005-9-21 07:30 PM

Support, thanks for sharing your story with us
作者: attaboy    時間: 2005-9-22 04:12 AM

......續前

之後每日食晏，Didi 除咗例牌會叫佢兩個姊妹（唔係親生既）阿瑪姬同碧斯，重會叫埋 Melody 一齊食，由於咁，我就得到咗一個其他男同事恨得牙癢癢既機會：每日都可以對住 Melody 食飯．每日食完飯，Didi 班女仔都嫌悶（凡係女仔都怕悶，都怕孤獨），通常都會 lau 我同兩三個男同事一齊出 Shopping Centre，有時食糖水，有時去 M 記得雪糕，有時就會去 P 記買零食．而呢的飯後餘慶就令我同 Meldoy 感情大進．不出兩個禮拜，我同 Melody 己經熟咗好多．佢亦開始同我講好多o野，好多時公事上有o野要問，佢會走過o黎第一個問我（雖然我同佢唔同 team，唔係樣樣都答到佢，但係有乜o野佢都會先過o黎問我，我知o既就答佢，唔知o既就話佢聽邊個可以幫到佢個問題）．第二個星期有日下晝，Meldoy 走過o黎同我講：你今晚會唔會留係公司？我諗：吓！呢句對白都通常係鹹濕老細同個秘書講個喎，做乜你......唔通你......都重未回神，佢己經話：我今日o的o野做唔晒，今晚要留o係公司 O，同 team 無人o係度，想睇下你會唔會都留o係度 O 之麻．哦！原來係咁．hm......其實o個日我都唔係好忙，只係起緊部機（男網友唔好心邪，我講緊係 setup 部 new PC），本來可以留返第二日做，但係一個咁楚楚動人o既女仔走o黎同你咁講，其實即係話：我今晚一個人留o係度好驚呀，你可唔可以留低陪我？咁作為一個正常o既男人，我當然做出一個正常o既反應，同佢講：而家搞緊部機，睇下搞唔搞得掂，如果唔掂，都應該會留o既．結果當然係：我同佢兩個o個晚一齊留o係公司做o野啦．不過大家唔好誤會，個晚完全冇任何香艷情節發生，我只係成晚對住部機，離遠望住 Meldoy 埋頭苦幹，間唔中行埋佢度問佢做成點，同佢講做唔晒不如攞返屋企做，但係佢話屋企好多兄弟姊妹，個個爭住用電腦，未必有機用，直至 10 點，佢好似參唔多做完，話可以走o勒，我就同佢一齊撘的士走（公司規矩，過咗七點半後冇 Shuttle Bus 可以撘的士 Claim 公數）．當時都幾開心，識 Meldoy 唔夠兩個禮拜就可以同佢單獨「同車」．我突然有種感覺，呢次唔通又係個天咁益我，為我舖排好晒，會唔會好似第一次咁，唔駛我點出手，就得美人歸呢......

[ Last edited by attaboy on 2005-9-22 at 06:16 AM ]
作者: edifier    時間: 2005-9-22 01:50 PM

支持你繼續寫下去!!!!!!!
作者: attaboy    時間: 2005-9-22 03:26 PM

......續前

到咗第三個禮拜，機會又o黎o勒．Melody 行埋我位，見到我枱頭一隻豬扒公仔杯，問我o係邊度買，我話係好朋友個女友送比我，賀我返呢份工o既．我問 Melody 問o黎做乜，佢話：我之前見到呢隻杯，都好想買，但係轉頭返去間鋪頭己經冇晒o勒．我同佢講：等我試下問我個 fren，叫佢幫你買！Melody 唔該我之後，我突然醒起一樣o野，問佢：你幾吋腰呢？ Meldoy 畀我呢個咁唐突既問題搞到好唔好意思，我隨即解釋：唔好誤會呀，唔係要知你私隱，只不過送呢隻杯畀我o個個女仔呢個禮拜生日，我想送翻份生日禮物畀佢，作為報答．我問過我個 fren ，即係個女仔個男朋友，送乜好．佢話送皮帶最好喎．女仔o野我最唔在行，因為佢 23 吋腰，見你同佢參唔多瘦，如果你都係 23 腰上下，可唔可以幫我揀條皮帶呢？ Melody 答：可以，不過你個 fren 鍾意乜野 style o既皮帶o架？我鍾意o既佢未必o岩，不如我同你一齊去買啦？我就話：緊係好啦，今晚你得唔得閒呀？ Melody 就話：應該得o既，不過要過咗四點先知重有冇o野做，陣間話你聽，先再約實啦．我話：一言為定！到咗下晝，Melody 都冇覆我，直至放工都冇．心情開始低落，一來我個人好重視承諾，亦好唔鍾意o個o的食言o既人；二來一心諗住 Melody 自己開口話同我去行街（雖然只係幫手揀禮物），本來滿心歡喜，但突然冇咗下文，所以有o的唔開心．加上自己真係有迫切要買份禮物畀施莉亞（即我個好朋友個女友，佢兩個都係我小學同學o黎，當時已經識咗十幾年），如果唔係，施莉亞一定嬲o架（女人就係咁，唔記得佢生日係死罪一宗）．放工時懷住 down down 地o既心情，同 Melody 一齊撘公司車出銅鑼灣．我一路都冇同佢講o野．當架車到咗 CWB 時，因係港島尾站，我同 Melody 都落車．見佢都冇回事，唯有問同 team 一個男人婆山渣（我同佢都熟，Didi 因住係九龍，會繼續撘去旺角先落車，所以冇搵佢幫手）得唔得閒幫我去揀禮物，山渣話：今晚唔得喎，不如叫 Melody 幫你啦，佢都住呢頭！（順帶一提，當時 Melody o係公司最 fren o既同事就係山渣）跟手叫住行緊既 Melody，同佢講：阿 at (attaboy 是也，下同)想搵人幫佢買禮物，你得唔得閒同佢去呀？ Melody 到呢個時候好似先醒起應承過我o既o野，登時好唔好意思，連忙同我講：哎呀！下晝掛住做o野，唔記得咗件事添．講完伸伸脷（佢o既慣常小動作），樣子好可愛．我話：唔緊要，我諗住你可能唔得閒，唔好意思推我，所以都冇再問你．Meldoy 急急澄清：得呀，得呀．只係唔記得咗之嘛！我話：咁係咪而家陪我去買呀？Melody：係呀！咁我就懷住 V 型反彈o既心情同 Melody 第一次行街街o勒......

[ Last edited by attaboy on 2005-9-22 at 05:31 PM ]
作者: hermas1001    時間: 2005-9-22 07:59 PM

好精彩 ^^
作者: edifier    時間: 2005-9-22 11:56 PM

Support!!!!!
作者: attaboy    時間: 2005-9-23 03:14 AM

......續前

Melody 帶我去到日資 S 字頭百貨對面一個年青人常去o既潮場，行呀行，揀呀揀，都搵唔到心水禮物．佢好似好落力同用心咁幫我搵，行過呢間話唔好，o個間話太貴，佢用佢o個種嬌滴滴o既語氣同我講：我唔想你畀人賣豬仔呀（即係買貴o野）！令我對佢o既好感登時又增三分．因為佢實在太會為人設想啦．行到累咗，我提議不如食飯先，佢話好，兩個人去咗一間粥麵連所店食晚飯．一路食一路傾，大部份都係講公司o既人和事．食完再去 S 百貨後面一間商場再搵，一路行我都好留意佢，雖然係當時我都唔係有心追佢，但係就好自然留意佢o既一舉一動，見佢行咗成晚都冇人 Call 佢，亦見佢銀包裡面個 Window 只係有 Forever Bear Bear 張卡，並無任何人o既相，我九成斷定佢係冇男朋友o既．同埋一路行一路同佢傾偈，知多好多佢o既野，最後o係電車路o個邊一間 H 大型商場地庫，Melody 搵到一條佢滿意o既皮帶，問我意見．嘿！女仔o野我邊知好唔好，求其話：好，梗係好！你眼光都唔錯噃！Melody 好似好開心（因為女仔通常問人意見，都唔係真係想聽意見，只係想搵人附和認同下佢o即）．畀完錢，送　Melody 去小巴站撘車，完滿地結束當晚行程o勒．
作者: siredes    時間: 2005-9-23 09:44 AM

暫時o黎講, 我覺得你第一個經歷比較精彩
不過都繼續支持!!
作者: attaboy    時間: 2005-9-23 11:39 AM

因為第二次比第一次長篇好多，其實寫到而家都重未決定追佢，故事未真正開始．而且呢次比較多枝節發生，自己需要竭力回想思索去整理，賞面o既朋友請體諒．

[ Last edited by attaboy on 2005-9-23 at 01:47 PM ]
作者: attaboy    時間: 2005-9-24 09:12 PM

......續前

過咗兩日，施莉亞生日勒，嗰日同佢同埋我個好朋友肯尼士（即佢男朋友）一齊食生日晚飯，一坐低，我攞出生日禮物，同施莉亞講：講明先，條皮帶係我搵人揀既，唔係我冇心，你都知我唔識女仔野架啦！八妹仔施莉亞連隨問：邊個同你揀架，我識唔識？我答：同事呢既......新返工，我都岩岩識，你梗係唔識啦．呀係勒，佢話想買你送畀我嗰隻豬扒水杯，你幫我搵下重有冇得賣丫？肯尼士同施莉亞因為識咗我十幾年，我既性格佢地係最清楚，施莉亞登時用好懷疑既口吻問：唔似你喎，新相識就對人地的野咁上心，係咪鍾意人，想追人呀？我被佢一問，自己都真係唔知點答，因為我都重未係好自知己係咪想追 Melody，唯有同施莉亞講：我都唔知喎，但係佢就真係幾吸引，幾特別......施莉亞就話：好女仔咪去追佢囉！你又而家單身一個人．我就話：你都知我性格啦，Minnie 件事畀我知道我唔係咁適合做人男朋友，況且而家搵錢至上，唔想諗其他嘢呀！但係施莉亞卻繼續慫恿：而家香港好女仔好少架啦，遇到好既唔追，第時佢畀人追咗先後悔就黎唔切架啦．食完飯，施莉亞講既嘢一路喺我個腦度徘徊，我開始認真去諗究竟好冇追 Melody，講真，Melody 真係完全符合晒一個夢中情人既條件：年輕貌美聰明善良有禮.....唔追佢真係好似好對自己唔住，但係有睇上集既朋友都應該大概估到我係一個唔容易相處既人，平時好地地，斯文有禮呃得下人，但係我一發起神經上嚟，莫講話女仔，就連男仔都會買晒我怕．（我曾經試過喺偉大既祖國同公安嘈，嘈到佢都驚咗我，嚇到佢面色由好有中國特色既官字面，一百八十度立即變為比日本電梯女郎更為有禮地同我沙冧 say sorry，但我喺大陸除咗翕得出江主席〔當時重未退位）個全名，係完全唔識有任何世叔伯喺偉大既黨裡面做事既，即係朝裡無人，大家可想而知我嬲起上嚟時大概係點）明知我既性格絕對係會嚇怕 Melody 呢的手無揸鎗之力既女仔，就算追到都唔會有好結果，越諗越多，越諗越煩．諗諗下醒起第一次拍拖時，阿老天爺實在對我不薄，咁啦，呢次都係交畀佢揸主意啦：如果施莉亞幫我買到隻杯，就追 Melody 啦！諗完自己都幾滿意呢個決定，安心去瞓覺．第二日施莉亞打電話畀我，同我講話唔好意思，佢去過間鋪頭，隻杯賣晒，問老板幾時再有貨，話最快都幾個月後．聽完心情一沉，語通個天叫我唔好追 Melody？咁唯有算啦，對自己所講既嘢都唔可以唔認帳架．但係第二日放工，真係好似做戲咁，當我係灣仔集天下之大成個商場等人時，得閒無聊中咗入去逛個圈（平時我係絕少行街既，好怕多人既地方），what!? 呢隻乜咁似我用緊嗰隻杯既？二話不說，立即入去攞杯畀錢，噢，估唔到老天爺佢來係咁鬼馬，想我追 Meldoy 都要玩下我先，好，就順下你意啦．心裡不期然泛起笑意......

[ Last edited by attaboy on 2005-9-24 at 11:22 PM ]
作者: homan~    時間: 2005-9-24 11:49 PM

Originally posted by attaboy at 2005-9-23 11:39 AM:
因為第二次比第一次長篇好多，其實寫...
冇問題

加油 !!!!!!

一定捧場
作者: siredes    時間: 2005-9-25 01:54 AM

Originally posted by attaboy at 2005-9-24 09:12 PM:
......續前

過咗兩日，施莉亞生日...
終於到戲肉喇~
作者: attaboy    時間: 2005-9-25 04:27 AM

......續前

第二朝一早返到公司，等阿 Didi 返黎．因為之前 Didi 見我同 Melody 喺公司出雙入對，有同我講過公司啲同事私底下都覺得我係同緊 Melody 拍拖，但當時我向 Didi 否認，重同佢講如果真係同 Melody 開始，會第一時間話佢知．等到 Didi 返工勒，第一時間捉佢入 Conference Room 密斟，我同佢講：之前你咪問過我係咪想追 Melody 既，而家我決定追佢啦，但係有件事我一定要搞清楚先，想搵你幫手打聽．Didi 話：你講丫，我一定幫既！由於同 team 一個做 intern 既男同事小吉係同 Melody 讀同一間建校十多年既大學，小吉曾經話 Melody 喺 U 度係有個做 tutor 既男朋友既，我想知既就係關於呢點．我問 Didi：我想知 Melody 係咪有男朋友，因為有男朋友既女仔我就一定唔會追！點知 Didi 都唔駛去做工夫，立即答我：係有！但係 Melody 同我講佢地就散......好似話佢 bf 有第二個，你可以等下先，等到佢地分咗手先追佢．當時我即答：咁，唔駛等啦，我唔追佢勒......Didi 個樣有啲無奈．我平時做人百無忌，但係自己有啲基本原則係好死板係唔違背得既，心情突然有啲低落，返到位，收到 Didi 依貓，佢 forward 咗 Meldoy 同佢既 ICQ 對話畀我：

Don't give up and hope your wish will become true.
We will fully support you ga !!!?Finger cross.....

Melody : why so many ppl disappeared ar

Didi : who do you want to find ar???!!?attaboy??!!? you two ar.....?um........ ;-)??good good friend??!! Tell me if you two are dating!!? I feel happy for you guys!!!!!

Melody : no... how come you think....just friend jar....i have a bf already i think we are only friend ma... at least I feel we are only friends he's nice, but no

Melody : my bf.... i don't know how to say ar... maybe, we'll not be together soon la..

睇完對心情毫無幫助，但係好感激 Didi 咁有心．當下將呢段 excerpt 腥畀肯尼士（同佢講咗我決定追 Melody)，加句：

唉！今天終於證實了﹐世事往往是不完美的。

肯尼時即時回返：

So sorry to know that. I am sorry also for not being able to talk w/ u 'cox I should go to a dinner. Anyway, my heart really feel a little bit pain after knowing that. Hope u can recover very soon. Find me any time if you want.

朋友呢樣嘢真係冇得頂，通常喺一個人最唔開心既情況下，朋友既關心係最能幫助渡過難關既．睇完肯呢士個依貓，心情好啲勒，而且當時重未陷得好深，好快平復．

過咗一陣，有公事要問 Melody，入佢地間房仔，一出聲，見到 Meldoy 兩眼紅晒，好以喊緊，但係我已經出咗聲問佢野，收唔返．見佢嘢都講唔到，只係搖搖頭，咁我只好行返出去．心裡面就諗：點解佢會喊既？唔通佢知到咗我唔追佢所以喊......咪傻啦，人地有 bf ，可能又同男友鬧交即．但係 Melody 剛剛嗰個我見猶憐既樣，卻係我腦內揮之不去......

[ Last edited by attaboy on 2005-9-25 at 06:35 AM ]
作者: homan~    時間: 2005-9-26 12:32 AM

bro~

多謝你既分享 !!!
令小弟獲益良多!!!!

加油呀~
作者: attaboy    時間: 2005-9-26 02:41 AM

......續前

本來有啲擔心 Melody，係嗰日下晝 Melody 好似己經冇事，間唔中四圍行搵山渣傾計，咁我都放心啲．之後幾日，雖然都係原班人馬食飯飲糖水，但係我就盡量借故避開同 Melody 獨單相處．過咗一個禮拜既星期五，公司班女仔發起放工後到紅磡嗰間位於陋巷但好出名既日本料理食飯，有成二三十人去．Melody 同我都報咗名話去．食飯時，Melody 全場坐喺我隔離，但係我就掛住同班同事講笑，冇乜理到佢．食完飯，一半同事話未夠喉，要去卡拉ｏｋ，咁 Melody 同我都繼續埋下半場，一班人分批撘小巴去旺角一間紅色盒子既ｋ場，我同 Melody 係最先到嗰批．入到房，Melody 坐低，見佢突然望住個熒幕呆咗，我望下個電視，只係播緊啲當期派台歌，都係情情塌塌天長地久之類既歌，但係 Melody 痴痴凝住咗一陣後，見佢對眼開始通紅，跟住兩行淚珠就係咁流咗落嚟．佢第一時間衝出ｋ房，見佢個手袋重喺度，我知佢係去洗手間，所以冇追出去．過咗兩三個字，都重未見佢返嚟，呢個時候 Melody 老細威叔到咗，問我 Melody 喺邊，幫佢托詞話：佢唔舒服，去咗 toilet，不過都去咗好耐，等我去搵佢返嚟．威叔就話：如果佢真係唔舒服，叫佢返屋企先啦！阿 at，你送佢返去啦！威叔實在係好人，佢之所以唔叫其他人送，係佢都知道我對 Melody 有意思，想造就機會畀我．一出房門，我諗下冇理由去女厠搵 Melody 架，唯有企响房門口等佢返嚟．過一陣佢卒之返勒，我係門口截住佢，同佢講：你唔舒服，不如我送你返屋企先？Melody 有啲猶疑，我知佢係怕老細話佢唔見咗人，因為佢係好緊張做嘢（即份工），亦好介意老細對佢既印象，我連忙補句：係威叔叫我送你返去既！一聽到老細個名，Melody 即時放心走勒，同我講：但我要入去攞翻個手袋．我話：我喺度等你．其實係唔想當住其他同事面前一齊入去一齊早走咁礙眼．落到樓，我話幫 Melody 截的士，佢話佢唔想返屋企住，想一個人自己行下．當時係星期五差不多十一點既旺角，我有啲遲疑，怕佢有危險．唯有同佢講：咁我陪你行啦！Meldoy 亦冇抗拒，但係又反問翻我：咁行去邊好？見佢個樣好似有好多嘢想講，心諗要搵處冇咁多人既地方先得，但當時腦裡唯一想到既合適地方就只有自己屋企樓下個公園，同 Melody 講：你信唔信我丫？佢點頭．我話，咁你唔好問，跟我上車．跟手上咗一架的士，直駛到我屋企附近，帶 Melody 行到去公園仔，一個人都冇，我面對面問佢：係咪有嘢想講？點知佢突然攬實我，哇一聲大喊出嚟，兼且講咗句：我男朋友有咗第二個呀！

[ Last edited by attaboy on 2005-9-26 at 05:10 AM ]
作者: attaboy    時間: 2005-9-26 02:46 AM

Originally posted by homan~ at 2005-9-26 02:32 AM:
bro~

多謝你既分享 !!!
令小弟獲益良多!!!!

加油呀~
多謝支持．如果有朋友真係喺我呢戀度領略到啲野，咁我呢戀衰都衰得有價值．同埋放心，講過會寫完就決不食言，只不過如果事忙要斷陣稿時，大家請耐心等待．謝！
作者: edifier    時間: 2005-9-26 09:52 AM

支持你,我D經歷同你有D相似,不過角色倒轉...
作者: attaboy    時間: 2005-9-26 02:54 PM

......續前

哭成淚人既 Meldoy 伏住喺我膊頭，我都唔知點好，但係衰啲講當時就幾享受佢個驕軀貼住我個胸膛既感覺．我用手輕輕拍拍佢背脊，喊完勒．我問佢：你男友有咗第二個，點解你重唔同佢分手？Melody 唔出聲望住我，又係嗰種無助既眼神，每次佢用呢種眼神望住我，我就會不期然想保護佢．知佢答唔出，唯有幫佢答：你好想離開佢，但係又唔捨得係咪？佢點點頭．跟住我話：我都唔明，你咁好，你男友重為乜去搵第二個？唉......Melody 若有所思，過咗一陣，回神返嚟，同我簡介佢同 bf 既嘢．佢話自從岩岩之前十二月（嗰晚係七月）發現佢 bf 有第二個，佢同佢 bf 既關係就一路好差，次次見面都嗌大交，而佢 bf 又唔肯嚟個了斷，兩個女仔都想 keep 住做齊人．Melody 重話，而家都唔知佢地重算唔算男女朋友，好似威叔（即佢個好人老細，其實當時得三十歲，但我喺公司有時叫佢威叔，我成日幫身邊既人安新朵既）有次問 Melody 有冇男朋友，Melody 話當時完全唔識答，心想答有但係點都講唔出口．見佢畀個花心蘿蔔搞成咁，我都躉佢難過．莫講話我對 Melody 有意思，就算換轉一個我完全冇 feel 既女仔同我講同一番說話，我都係會深惡痛絕嗰個一腳踏兩船既男人．一來我最鍾意既金庸小說係神鵰俠侶，楊過嗰種一往情深，明知全世界反對都要去既做法係最合我脾胃．加上本人個老竇（又註；老竇其實又係好禮貌既稱呼嚟，源自竇燕山教出五個叻仔，時人尊稱佢為老竇，係細個睇每日一字阿林佐翰講既）都係一棵絕非桄榔樹心做既蘿蔔，所以我係好痛恨呢種人既．不過話說回來，其實我覺得一個男人就算同時間擁有多過一個女人都唔係大問題，好似韋小寶阿鹿鼎公佢就有七個，好少聽人話佢做法有問題．所以其實重點係，踏幾多船都冇問題 - 如果每條船都知其他船既存在兼且係大家都同意，咁在我嚟講，不單止唔會睇唔起嗰隻腳個主人，而且重會好欣賞同羡慕佢添．不過好明顯，Melody 個 bf 就絕對唔係咁既 ideal case 勒，如果唔係，Melody 都唔駛喊到咁慘情，同佢傾咗半個鐘到，Melody 同我講話好痕，我問佢點解，佢話好多蚊呅佢．講真，話 Melody 啲皮膚同 BB 女參唔多係絕不為過既，又難怪啲蛟咁識食，針佢唔針我．我同佢講：駛唔駛搽啲藥油，樓上就係我屋企，我阿媽係大把呢啲存貨既．Melody 本來話唔駛，但係過多一陣，佢好似真係痕癢難擋，改口話都係要搽喎．咁我就同佢上咗我屋企，搽完油，順便帶佢睇我間房．以前我係書癡，有三千本藏書，不過大部份都冇睇過，但我係好鍾意過買書癮既．Melody 見我書櫃裡面有一半係電腦書，一半係文學書，覺得好奇怪，佢話呢兩種書係兩種唔同人睇既書，唔應該擺埋一齊．當時我諗：有咩問題呢？乜你唔識阿 Leonardo Da Vinci 咩，佢咪重多辨數？不過可能同佢講 Leonardo ，佢只會聯想到 Titanic，所以只係笑笑口，冇駁佢．跟住見佢未話要走，我就攞啲中學既校刊校報畀佢睇，順便簡介下自己．佢聽到都幾入神，似乎暫時忘記咗啲唔開心既事．傾傾下，佢問我幾點，我話十二點幾啦，佢話要走，屋企唔畀太夜返喎．我就喺佢走前，話見佢咁慘，送份禮物畀佢．佢連隨話駛啦．唔貪小便宜係佢一大好處，Didi 亦有呢個特質．我話，你睇下先啦！跟手攞隻豬扒杯出嚟，佢見到有啲驚奇．我就解釋前因後果佢聽，重同佢講：本來個天係要我追你，但係大家識得唔著時，我唯有認命．但係隻杯你都 Keep 住啦，反正我已經有隻，而你又鍾意！Melody 伸手接過，默默無言．之後我送佢落樓，係電梯度，我同佢講：我做人冇乜好，但係從來就清清楚楚，絕不拖泥帶水，希望佢都可以做到呢點．Meldoy 用好感激既眼神望住我講咗句：多謝你呀！送完佢上的士，我心裡面感慨萬千，點解我唔早啲識到 Melody，如果早啲識到佢，佢可能就唔駛受呢啲苦啦......

[ Last edited by attaboy on 2005-9-26 at 05:28 PM ]
作者: attaboy    時間: 2005-9-26 03:27 PM

Originally posted by edifier at 2005-9-26 11:52 AM:
支持你,我D經歷同你有D相似,不過角色倒轉...
恭喜你．做我個角色絕對唔係咁好過......
作者: hkcitywong    時間: 2005-9-26 09:47 PM

man, what a good story
作者: edifier    時間: 2005-9-27 12:57 AM

Originally posted by attaboy at 2005-9-26 03:27 PM:


恭喜你．做我個角色絕對唔係咁好過......
點都好,睇見你的故事好似睇到我以前咁,雖然只有小部份相同,不過比我一種似曾相識的感覺!
作者: attaboy    時間: 2005-9-27 01:50 AM

......續前

送完 Melody 返上樓，心裡面戚戚然．本來之前當我從 Didi 口中得知 Melody 有男朋友時係有啲嬲 Melody 既，覺得佢有男朋友重係公司同其他男仔咁親密，唔係一個好女仔既行逕．但係見過頭先佢個傷心難過樣，我又變得有些少同情佢，兼且明白點解佢會咁做．但凡女仔一唔開心都想搵人關心，搵人呵護，係好正常既，所以一路怪佢既感覺就慢慢冇咗．同埋，自己都要負啲責任，自己應該知道，好似 Melody 啲咁吸引人，咁高質素既女仔，又點會冇男朋友丫？呢個時候我想起 Murphy's Love Law　（Murphy 係我地電腦人既偶像，因為佢另一條 IT Law：If anything can go wrong, it will 係我地既最佳既座右銘）:

Brains x Beauty x Availability = Constant.
This constant is always zero.

簡單啲講，條式係話通常一個好既女仔，聰明，靚女，單身，三樣裡面如果個女仔有其中兩樣，咁剩低嗰個條件就一定係零既．咁 Melody 咁靚女又聰明，我其實一早就應該估到佢既 Availability 係 Zero 既，要怪只好怪自己一厢情願，都唔怪得晒佢．

過完 Weekend，星期一又要返工勒．出門口前我攞埋一本歌書．本書係以前讀中學時自己編既，主要係將當時大部份流行曲既歌詞收錄埋一齊，因為我班死黨係好鍾意唱歌既，雖然我自己唔係咁好，但係就鍾意出版編輯，所以幫佢地搞本書出嚟，自資印咗二百本，每個 Fren 送一本．因為之前 Melody 喺我屋企都見到，攞嚟睇過，佢話書裡面啲歌佢好鍾意，咁順水人情，諗住送本存貨畀佢．手攞住本書，突然心血來潮，搵咗張原稿紙，寫咗幾句說話．都係啲鼓勵既說話，叫 Melody 唔好咁難過，男友唔珍惜佢，重有大把朋友關心愛護佢，至少我重會關心佢．雖然有啲肉麻，但係鬼叫我知女仔就最鍾意聽呢啲肉麻嘢咩．寫完摺起張紙夾喺本書裡面．

返到公司，未見 Melody，等咗陣，佢返勒．行入佢房，見得佢一個，攞本書出嚟，話：你咪話好鍾意呢本歌書既，我有多本，送畀你啦．Melody 見唔係貴重禮物，都樂意收下（佢份人係無功不受祿嗰種人）．行出房前我交帶佢：千祈唔好借畀人睇呀！佢點點頭．

當日放工，我如常坐公司車走，車上冇乜人（因為大部份人都撘咗之前嗰班車走）．我搵咗個冇人窗口位坐，山渣跟住上車，坐咗我後面另一個窗口位．最後 Melody 上車（因過完呢架車就再冇公司車走，所以我都預咗見到佢），但係佢冇好似平時咁同山渣坐（山渣旁邊個位重係空既），佢停咗停，坐咗喺我隔離，我當時都幾意外，唔知講乜好．佢亦全程頭 dug dug，即眼觀鼻，鼻觀心嗰隻含羞答答既樣子．哎呀，小姐乜你咁搞呀，你咁做係會畀到好多不必要既聯想我架，即時諗起雷蒙嗰句：呢次我死勒......

[ Last edited by attaboy on 2005-9-27 at 04:25 AM ]
作者: attaboy    時間: 2005-9-27 04:16 AM

Originally posted by hkcitywong at 2005-9-26 11:47 PM:
man, what a good story
thanks for reading. yep. the story is good, yet my feeling was not when it was taking place. anyway, it's all over now and my feeling on Melody had long been fading - and were almost gone. It's just an interlude in my life, significant though......

It's still the same old story
A fight for love and glory
A case of do or die
The world will always welcome lovers
As time goes by

[ Last edited by attaboy on 2005-9-27 at 06:26 AM ]
作者: wallaby    時間: 2005-9-27 07:54 AM

hi at let me guess.... she had just taken you as a spare tyre right?
作者: siredes    時間: 2005-9-27 09:23 AM

Originally posted by attaboy at 2005-9-27 01:50 AM:
......續前

送完 Melody 返上樓，...
睇o黎Melody開始對你有feel喇喎

個故事愈來愈吸引喇!

阿at如果你遲D有時間, 可唔可以幫你呢兩個愛情故事寫一篇後記? 因為我都好有興趣想知道兩位女主角o既事, 例如你仲有冇同佢o地保持聯絡, 又或者知唔知佢o地o既近況等等...

Thank you very much!
作者: attaboy    時間: 2005-9-27 10:40 AM

Originally posted by siredes at 2005-9-27 11:23 AM:


睇o黎Melody開始對你有feel喇喎...
可以既.但涉及人地私隱既事就恕不能奉告勒.

同佢兩個之後關係大概如下:

同 Minnie 分手後一年都保持好朋友關係，佢有乜唔開心都會喺海外打電話同我傾．但係分手後佢已經有個台灣仔男朋友．（ Minnie 同 Melody 基本上都同大部份女仔一樣，時時要人陪，係唔可以一個人生活既）而 Minnie 經常搵我既原因係投訴佢男友，咁我當時其實都幾介意同佢講呢個題目，因為我都重鍾意佢．但係見佢真係唔開心，冇法子勉為其難開解佢．後來做嘢成日出 trip，唔係香港，整整下佢就無打畀我．而我亦唔想打畀佢．冇同佢見面或傾偈己經兩年幾．今年剛返到墨市生活，一路我都冇搵 Minnie （佢一直冇返香港，喺呢邊做嘢），直至上個禮拜，佢從另一個朋友口中得知我返咗嚟長住，打電話畀我，約我食飯．但係喺電話度佢又發脾氣，話我啲態度咁多年都冇變，重變本加厲．呢個係事實，我以前已經好串，而家更加唔會畀面任何唔講道理既人（而女人偏偏天生就係不可以理喻，佢地係感性動物嚟）．我諗 Minnie expects 我好似以前對女朋友咁對佢，呢樣係冇可能．因為喺上集裡面我有樣嘢係冇提到．當年 Minnie 同我分手既誘因就係個台灣仔追佢．當時我雖然冇怪佢，（因為我本身性格都有好大問題），但係，我係有種被出賣既感覺．我係冇可能再同佢喺埋一齊．或者講得玄啲，而家既 Minnie 已經唔係我心目中懷念嗰個 Minnie（即係上集所寫嗰個）勒．唔明既朋友或者可以去睇一睇倚天屠龍記，蛛兒最後念念不忘既係阿牛哥（其實即係少年張無忌），堅持張無忌唔係阿牛，道理係一樣既．

至於 Melody，同佢拖拖拉拉差唔多兩年，最後因為發生好多事，三年前佢突然有晚 SMS 叫我以後唔好再理佢．可能佢覺得欠我太多，唔想再玩我（雖然佢曾經誓神劈願話從來都冇立心要玩我）．之後就冇聯絡啦．直至前年施莉亞結婚時請埋佢，而我係做施莉亞姊妹團成員（成世人第二次做姊妹，第一次係幫 Didi 做），擺酒時再見返 Melody．Melody 其實完全唔識施莉亞啲朋友，佢兩個只係因為我先至識得．Melody 嗰晚成晚坐喺我隔離，但係我掛住同小學同學傾計，冇乜同佢講到嘢．而家己經冇乜聯絡．我唔搵佢，佢係絕對唔會再搵我既．因為佢好薄皮，怕睇我啲唔老嚟面色．自己亦冇乜興趣再搵佢，因為對佢好失望......

我會喺寫埋下集後加多個補遺，尤其 Melody 嗰單，實在發生太多事．我知一定有嘢講漏咗，唔想捧場既朋友一頭霧水．

[ Last edited by attaboy on 2005-9-27 at 12:42 PM ]
作者: edifier    時間: 2005-9-27 12:39 PM

attaboy,

雖然俗語話講古唔好駁古,不過我都係想問下你,你上面個post話同minnie分手的原因,係因為有個台灣仔追佢,但上集的故事內好似只係曾經有次minnie搵左個人黎佢屋企玩煮飯仔而激嬲你,係唔係就係果個????

如有唔0岩聽的說話,煩請多多包涵!

[ Last edited by edifier on 2005-9-27 at 12:43 PM ]
作者: siredes    時間: 2005-9-27 12:52 PM

Originally posted by attaboy at 2005-9-27 10:40 AM:


可以既.但涉及人地私隱既事就恕不...
哦...原來你而家係住o係Melbourne...我仲以為你而家住o係香港添.
"直至上個禮拜，佢從另一個朋友口中得知我返咗嚟長住，打電話畀我，約我食飯．但係喺電話度佢又發脾氣，話我啲態度咁多年都冇變，重變本加厲． "<<  咁後尾仲有冇同佢出去食飯?
"而女人偏偏天生就係不可以理喻，佢地係感性動物嚟" <<  絕對同意! 附加一樣 - 十分情緒化!
其實睇o左咁耐你以前o既經歷, 我都覺得你o既脾氣真係幾大o下(Sorry)...其實你有冇諗過, 如果你o既性格溫和D, 咁你呢兩段愛情故事o既結果可能會有好大o既分別? 我咁講唔係想教你呀, 只係由客觀o既角度去分析咋. 不過我覺得真係好難做到"再見亦是朋友", 至小我仲未做得到...
咁施莉亞係咪同阿肯尼士拉埋呢?^^
P.S. 你成日用金庸o既故事去作比喻, 令我想去借返D金庸o既小說o黎睇!^^"
作者: attaboy    時間: 2005-9-27 06:57 PM

Originally posted by edifier at 2005-9-27 02:39 PM:
attaboy,

雖然俗語話講古唔好駁古,...
唔緊要．問清楚係好事．我份人最鍾意事情水落石出架勒．

第一戀其實臨尾分手時，Minnie 有同我講，話有個台灣仔追緊佢，不但好脾氣而且好就得佢．之後分咗手後一個月，佢就同台灣仔喺埋一齊．上次冇講到既原因，主要係我覺得，我既性格先至係癥結，其他嘢係其次，唔想將責任推落 Minnie 到．（我啲朋友都覺得 Minnie 對我唔住，但係佢為我犠牲既係我呢個當事人先最清楚）以 Minnie 既個性，能夠唔發我脾氣兩年，已經係超乎佢既極限．呢樣佢後來同台灣仔搞到好唔開心時都有同我提翻.其實 Minnie 平時既脾氣比我重大，加上佢細路女，成日為啲雞毛蒜皮既事發炆，搞到自己同其他人都唔開心．Minnie 同我講，都唔明點解以前佢可以就到我咁耐，希望對住台灣仔都可以收歛下脾氣．但係我知以前 Minnie 喺我面前唔敢發脾氣係因為佢見過我發脾氣個樣，實在又幾嚇人既．好似雷蒙以前係公司都出名硬淨同態度差，但係我臨辭職前同佢炒咗次金既，搞到佢喊咗出嚟（件事都幾長篇，或者喺講 Melody 時有機會順便寫幾筆啦）．又試過鬧咗施莉亞幾句，佢足足嬲咗我兩個月，真係好嬲嗰種，肯尼士喺嗰兩個月裡面係完全唔敢提我個名同見我．後尾施莉亞同我講翻，話畀我鬧完嗰幾晚，成日發惡夢，夢見我鬧佢個樣．所以就算冇台灣仔，我覺得同 Minnie 都會散，而且我想留個美好回憶，所以上次冇寫個台灣仔出嚟．並非全心隱瞞，只是無關重要既都略去啫．
作者: attaboy    時間: 2005-9-27 07:35 PM

Originally posted by siredes at 2005-9-27 02:52 PM:


哦...原來你而家係住o係Melbourne...
Minnie 上個禮拜打完畀我，話我語氣唔好又嬲咗我，跟手話飯都唔駛食喎．（不過老實講，佢啲脾氣都同樣係冇改過，但佢死話已經好好多喎）．

的而且確，如果我脾氣係好啲，唔單止呢兩段情可以改寫，而且重可能會有多好多段寫畀大家睇添．但係我既矛盾係，就算遇到啱心水既女仔畀 Signal 我去追佢，我都唔想去害佢．因為女仔要拍拖無非係要人錫，要人關心，要人畀佢出氣．呢啲在我嚟講都係唔係好畀到既，尤其係最後嗰樣，機乎完全提供唔到．

唔駛 say sorry. 自己知自己事．我既脾氣係好奇怪，初相識我既人都會覺得我係斯文好靜嗰聽人．但係當我一遇到唔公道既事時，我就好似變咗另外一個人咁（有啲似 Hulk）嚇走人．不過其實我真正發脾氣既時候並唔係咁多，只不過我發起上嚟真係火燒連環船咁，燒得好徹底，不過都多謝關心，而家我已經決定喺一個我覺得最公道既國家終老，呢度既人真係有時 fair 到我自愧不如，所以再冇發脾氣勒．有機會再同大家分享呢度既風土人情啦．

施莉亞同肯尼士嗰單，重戲劇化過我既故事．佢地拍拖十年，差不多要結婚時殺出個情咬金 - 肯尼士畀人撬咗，過冇耐重結埋婚．施莉亞重神奇，過兩年後同咗一個肯尼士既大學同學結婚 - 一個癡癡等咗佢好多年同好呵護佢既男人......
作者: attaboy    時間: 2005-9-27 10:27 PM

......續前

嗰日之後，我都冇進一步行動，因為 Melody 名義上重係人地女朋友，我過唔到自己嗰關背負第三者之名，唔係，計落係第四者先啱．但係同佢就回復之前咁，食完午飯兩個人行咗去，有時去買零食（我本身唔係好食，但係 Melody 就好鍾意）．有時就同佢去飲嘢，過咗兩個禮拜，公司要搬勒（間法蘭西公司水頭係好充足既，之前屈係李生個半島度係未物色到見得下人既 Office 即）．新 Office 係位於李生個冤家，即係阿皮蛋吳喺 TST 個有海有港既威威大廈度．嗰個星期六，公司要我地返去新公司 Unpack 嘢．當然 Melody 同我都有到啦．執執下嘢時，雷蒙叫我埋佢位話有嘢同我講．佢細細聲問我係咪同 Melody 拍拖，我話唔係．佢話如果唔係就叫我同 Melody 喺公司唔好咁張揚，免得畀人講閒話喎，重話唔想畀人覺得我返工係為咗識女仔而唔係做嘢．講緊既時候，Melody 經過，見佢對眼係咁望住我同雷蒙，好似好緊張．到雷蒙哦完放人，Melody 打我 Mobile 問我陣間食唔食晚飯，我話好呀．到執完晒嘢，同 Melody 返翻港島食飯（我同佢都係住嗰邊）．我地去咗 CWB S 商場地庫食嘢．睇住 Melody 細啖細啖好斯文既食相，我覺得啲食物好幸福．食完後，走返上地面，Melody 就問我頭先雷蒙講咗啲乜？我知佢實會問，因為雷蒙同威叔都好熟，我估到佢係想知威叔對佢有冇微言．我將雷蒙番說話覆述一次，佢都唔係好放心．我話唔駛咁擔心，威叔份人又好人又明白事理，唔會亂講嘢既．講完呢樣，同佢重係喺條街到蕩下蕩下，但佢又冇話要返屋企，唯有絞下腦汁搵下節目（呢樣係男仔既責任嚟）．但係以前我除咗鍾意對書就係對電腦，冇乜好去處可以提供．諗完一大輪，都係發揮自己既強項啦 - 傾偈．不過呢次冇諗住再去自己屋企樓下個公園，唔係 Melody 實以為我係賣金魚．同佢提議開房......咪諗錯隔離，係搵間卡拉ｏｋ攞間房坐低慢慢傾．去到灣仔間ＱＫ卡拉ＯＫ攞房，個 receptionist 話如果可以十點鐘還房就即刻有房喎（當時八點左右）．咁我都冇諗住留好耐，（因知 Melody 唔夜得返屋企）話冇問題照攞．入到房，唔係麻，兩個人畀間成十人既房，唔通同靚女出街真係咁多人爭住畀著數？都冇去深究，更加冇理由嗌換房，就同 Melody 坐低咗．Melody 叫我點歌唱，我話黃家駒去咗後我都冇乜再聽 Canton Pop，冇乜歌識喎．跟手同佢講話不如唱首畀我聽，佢又好聽話點咗首楊千Fa既歌唱．（首歌我真係唔識，所以都唔記得係邊首，應該係當年既 Hit 歌嚟）Melody 因為把聲本身好聽，雖然唱歌技巧欠奉，但係聽落都算唔錯．佢唱完兩三首後，係都要我唱翻首，只好揀首家駒既光輝歲月（當年開始真正欣賞 Beyond 就係因為呢首歌，歌詞好有意思）唱完勒，同 Melody 講其實我有啲嘢想同佢講．我話我份人平時睇落係唔錯，但係間唔中會發下神經，會幾嚇人既，所以當初打算追佢時都掙扎咗好耐，但係我唔想佢將來有任何誤會，見到我變身個樣時，以為我不嬲係扮斯文搏佢好感．同埋，我同佢講，由於我知到咗佢有男朋友，我係冇可能喺呢個候追佢既，但係如果佢要搵人訴苦，我係樂於做佢個聽眾既．Melody 聽到呢度，突然嗚嗚嗚咁喊咗出嚟，重成個人匿咗入我個胸前，我當時都唔知點反應，淨係識用手輕掃佢個頭．佢一路喊一路講：我好辛苦呀，我唔想同佢再係咁樣呀！你教我點做丫？　　吓！小姐，呢個係一個 PhD 既 Thesis topic 呢喎，我就算識答都一言難盡啦．只好用翻讀書時考試既技巧 - 亂答一通搏大霧同佢講：好多嘢呢而家覺得係好大件事，過後睇返通常都不外如是啫．放開啲啦．話唔定有朝一日你起身，連佢係邊個都唔記得 Lu．呢個答法好似幾過到骨，Melody 開始收聲勒，但係佢個人都重係停留喺我懷抱度，好似唔捨得移開．咁點好，唔通我大聲嗌非禮咩，差人嚟到一見到 Melody 個樣,唔駛問即刻告我浪費警力都似，只好由得佢．過咗一陣，Melody 自己起身話要去洗手間，咁我終於喺溫柔鄉蘇醒過嚟勒，但係腦裡面停留既重係佢身上嗰陣陣幽香．

[ Last edited by attaboy on 2005-9-28 at 12:45 AM ]
作者: siredes    時間: 2005-9-28 12:17 AM

Originally posted by attaboy at 2005-9-27 07:35 PM:


Minnie 上個禮拜打完畀我，話我語...
嘩...估唔到施莉亞同肯尼士之間o既愛情故事都會咁曲折, 真係利害...
作者: homan~    時間: 2005-9-28 12:32 AM

Originally posted by attaboy at 2005-9-27 10:27 PM:
......續前

嗰日之後，我都冇進一...
bro~

小弟有d 似你wor

大家都好似唔係好識做人男朋友咁  

加油 bro,

返工幾忙都捧你埸 ~
作者: yungting0623    時間: 2005-9-28 12:50 AM

繼續支持~~~~
作者: edifier    時間: 2005-9-28 01:31 AM

attaboy:

唔好話有冇心隱瞞,你肯同大家分享已經好好啦! Thanks!!!

不過我有另一樣關於你的野想知, 點解你決定要在澳洲"終老"呢????
作者: attaboy    時間: 2005-9-29 02:13 AM

Originally posted by homan~ at 2005-9-28 02:32 AM:


bro~

小弟有d 似你wor

大家都好似唔係好識做人男朋友咁  

加油 bro,

返工幾忙都捧你埸 ~
多謝支持．唔識做人男友唔緊要，冇人一生出嚟就識既，呢樣係可以學既．我諗你唔同我，我係冇得救架啦，（因為我既問題基本上係性格使然，可以做既其實唔係咁多）加埋自己亦唔想去醫，呢樣說來話長，以後有機會再解釋．

我諗你所不足既係經驗唔夠，同唔了解女仔，即大部份男仔喺 Love Affair 度所欠缺既嘢．唔駛咁灰，冇人既問題會好似我咁嚴重，但我都有 Keep 住 Improve，信唔信都好，今日我要追女仔，要維持一段關係已經唔係難事嘞，但係我性格上另一特點係唔可以被人縛住，亦唔可以有負累，我好嚮往一個人自由自在，無拘無束既生活．我唔想亦唔會為拍拖而犠牲呢樣嘢既......

[ Last edited by attaboy on 2005-9-29 at 04:50 AM ]
作者: attaboy    時間: 2005-9-29 02:48 AM

Originally posted by edifier at 2005-9-28 03:31 AM:
attaboy:

不過我有另一樣關於你的野想知, 點解你決定要在澳洲"終老"呢????
嘩！你問呢個問題我如果要你明白，係要用十版八版篇幅去答既．不過畀住個 point form 你先，以後如果重有空檔先再慢慢解釋啦．

- 我既性恪係不能見容於中國人社會既．呢樣我過去嗰 26 (out of 30) 年每日都不停證實
- 我追求公道，簡單，直接，和諧，呢啲中國人社會好難搵到（尤其第一樣）
- 我既物慾唔高，但係對住既地方空間就有啲要求，喺香港，我冇本事買到我想住既樓（而家喺 OZ，澳洲之謂也，我月租 A$1000，即六千港紙到，已經係我理想居所嘞）
- 我鍾意澳洲人，佢地 fair, friendly, 又鍾意睇書，同我啱晒 feel（我諗香港個百萬富翁台柱，過到嚟上 Who Wants To Be A Millionaire 實畀啲問題嚇親）
- 我條命係唔辛苦得既，香港地太匆忙，唔啱我．OZ life 係好 easy 好 relax 既
- 喺香港，我好難搵到交心既朋友．（我最好既香港朋友，都係我中學既同學，佢地都同我思想相近，但係緊係冇我咁嚇人，好奇怪，可能係喺同一個環境培育出嚟有關．順帶一提，我讀嗰間中學係全港第一間中學，開埠十年已經建校，心水清既朋友一定知係邊間)
- 留係香港，就算我幾本事都好，都好似係靠屋企（本人條命尚算托賴，屋企有啲家底）．我想追求 Independence，最好既方法就係到一個遠離屋企既地方從新開始．（我喺OZ係一個親戚都冇既，只有一班十年八年前識落既朋友）

......重有其他理由，時間所限，恕不贅列啦.

[ Last edited by attaboy on 2005-9-29 at 04:52 AM ]
作者: edifier    時間: 2005-9-29 08:51 AM

Originally posted by attaboy at 2005-9-29 02:48 AM:


嘩！你問呢個問題我如果要你明白...
Attaboy,

唔緊要啦,你搵到一個理想的居住地係一件好事,題外話知下就算,里度講里度散啦!
作者: siredes    時間: 2005-9-29 09:34 AM

快D繼續講埋個故事先啦~我等得好心急喇~~
作者: humphreyhaha    時間: 2005-9-29 09:57 AM

快D繼續講故事先啦, 我都等得好好好好好好心急喇~~Thank you!
作者: yungting0623    時間: 2005-9-29 03:56 PM

依我所知,全香港第一間中學好似係spc........spc係男校...咁岩你又係和尚寺出身.......唔通.........
作者: attaboy    時間: 2005-9-29 04:37 PM

嗰晚跟住發生既事，我都唔知點寫好......有啲嘢唔出得街，有啲我又想有小小保留，因為都牽涉到其他人既名節既．而且嗰晚同跟住之後一晚係我情陷 Melody 既轉捩點．請 Spare 多一兩日，等我諗諗點表達好啲．

[ Last edited by attaboy on 2005-9-29 at 06:40 PM ]
作者: attaboy    時間: 2005-9-29 04:39 PM

Originally posted by yungting0623 at 2005-9-29 05:56 PM:
依我所知,全香港第一間中學好似係spc........spc係男校...咁岩你又係和尚寺出身.......唔通.........
中！

任總志剛，鍾大蛇，古老師德明，白鴿黨頭目，現經濟局長......等都係同門師兄．

[ Last edited by attaboy on 2005-9-29 at 06:49 PM ]
作者: siredes    時間: 2005-9-29 04:53 PM

Originally posted by attaboy at 2005-9-29 04:37 PM:
嗰晚跟住發生既事，我都唔知點寫好......
你咁講反而令我更加心急想知道跟住發生o左D咩事

不過都係等你組織o下先啦.
作者: yungting0623    時間: 2005-9-29 08:07 PM

Originally posted by attaboy at 2005-9-29 04:39 PM:


中！

任總志剛，鍾大蛇，古老師德明，白鴿黨頭目，現經濟局長......等都係同門師兄．

[ Last edited by attaboy on 2005-9-29 at 06:49 PM ]
估唔到呢個世界真係咁細.............原來大家都係st paul仔...........咁我諗以後要叫你做師兄啦..........仲有,如果你得閒,希望你可以教下我點樣識女仔同埋點樣同佢地相處.........因為係過去既7年,除左我呀媽之外........一個女仔都未識過..........搞到而家讀緊大學,要同d女仔相處個陣,有d不知所措=.=".....
作者: attaboy    時間: 2005-9-30 01:38 AM

Originally posted by yungting0623 at 2005-9-29 10:07 PM:
估唔到呢個世界真係咁細.............原來大家都係st paul仔...........咁我諗以後要叫你做師兄啦..........仲有,如果你得閒,希望你可以教下我點樣識女仔同埋點樣同佢地相處.........因為係過去既7年,除左我呀媽之外........一個女仔都未識過..........搞到而家讀緊大學,要同d女仔相處個陣,有d不知所措=.=".....
咁你有冇畀 KH顏 SIR 教過呀？佢係我同班同學兼知己．五年前佢有次叫我返去 SPC 同佢班學生講嘢，唔知你係咪佢嗰班呢？喺羅記讀書嗰七年係我前三十年裡面最開心既日子同回憶．最感謝既就係韋廉信老師，當年 F.6 得罪咗一個阿 Sir，佢死都要我 Repeat 一年 F.6．當年創校 142 年都冇人試過 F.6 要Repeat，都唔知佢點解咁有創意．最後幸得韋廉信求情力保，先至唔駛咁丟人要降班......有時間去下 Alumni 啲聚會啦．SPCAA 啲師兄弟都好好人既．

hm...咁你而家有冇心儀既對象呢？冇就物色個先再問我啦．因為好難一下子教到你由唔識同女仔相處，變到追女仔既最高境界 - 萬物朝宗，即係令女性物體自己主動嚟 appoach 你，呢樣係喺阿 Melody 身上學翻嚟既（當然佢嗰啲獵物就係男性啦）．
作者: yungting0623    時間: 2005-9-30 08:07 PM

Originally posted by attaboy at 2005-9-30 01:38 AM:


咁你有冇畀 KH顏 SIR 教過呀？佢...
原來你同顏sir同屆架@@........真係好可惜,我讀左7年......都冇俾佢教過~"~...反而就試過同佢踢波......顏sir佢真係好好人......繼何佬之後.......我諗d學生最鍾意既老師就係佢......
仲有,你唔講都唔知,原來williamson咁大影響力架........睇佢平時嬉皮笑臉,玩下玩下咁.....真係睇唔出......

至於講到女仔呢.....而家連點相處都唔識........仲邊有對象可言.......就算有對象,以小弟既專容.......唔嚇走d人已經執到......
作者: homan~    時間: 2005-10-1 01:13 PM

Originally posted by attaboy at 2005-9-30 01:38 AM:


咁你有冇畀 KH顏 SIR 教過呀？佢...
brother~~

我都好想學呢 ~~~~

快d快d................


估唔到又有勁人出現 !!!!!

26fun 真係高手如雲.............
作者: homan~    時間: 2005-10-1 01:16 PM

Originally posted by attaboy at 2005-9-29 02:13 AM:


多謝支持．唔識做人男友唔緊要，...
bro,
你講得好arm,

小弟真係冇咩經驗

溝到之後都唔係好知點做.....................

期待你的故事lei~~
作者: attaboy    時間: 2005-10-2 07:24 PM

......續前

過咗陣，Melody 返翻嚟嘞，但係望下表，已經十點有多，係時候要還房．同 Melody 講不如走囉，佢冇異議．埋咗單，同佢係街上再蕩過．見佢好似冇意思返屋企，咁點呢？女仔好多時都好似嗰啲做老細既，唔say no 時即係等緊啲馬仔畀意見，咁同 Melody 飯又食完，ｋ又唱過，夜媽媽都唔知去邊好，唔通去佐敦間數字的士高咩，講出嚟即刻嚇走佢都似．冇計，淨翻最後一個好去處：我屋企．大家可能會諗我呢個提議係有不軌目的既，天地良心，當時我淨係想搵笪靜啲既地方同佢繼續談心．但係亦考慮到 Melody 會諗錯隔離，只好用返之前嗰招，我同佢講：你信唔信我？佢點頭示意．我就話：咁就得嘞，跟我上車．即時伸手截的士，Melody 毫不猶疑即刻跟我上車．我同司機講去半山，當時 Melody 都估唔到我會帶佢去邊度，因為佢雖然嚟過我屋企，但係佢係連嗰頭係邊都唔知既．唔駛三個字到咗我家樓下．同佢上樓，見 Melody 個樣都冇不悅，唔似有被人賣咗豬仔既感覺，咁我都放心啲．入到屋，見冇晒燈，知阿媽瞓咗（屋企只係我同阿媽兩個人），叫 Melody 小心啲，唔好嘈醒我阿媽，佢都好合作．跟住我帶佢入我房，繼續傾偈．Melody 好似上次咁，自己坐咗上去我間房個窗台度，我就又擔張櫈坐對住佢．我同佢講：其實我重有樣嘢想同你講既．本來如果我真係追你，呢樣嘢你一定要知，但係而家件事發展成咁，你知唔知其實都冇所謂．但係我都想講下．　跟住我就簡單同佢講咗我同 Minnie 既故事，臨尾加句：所以就算你冇男朋友，我其實都唔應該追你既，因為我個心重係掛住 Minnie 既．（捧場既朋友請注意，以上呢句係自殺式金句，係反面教材．喺買到隻杯當晚，我同肯尼士同施莉亞喺電話度就呢句應唔應該講拗咗好耐．佢地都認為冇必要講，同埋冇女仔會考慮一個有二心男仔既追逑既，但我之所以要講，係我份人最唔鍾意嗰啲呃呃氹氹既人，即係假人．所以對朋友，辜勿論是男是女，從來都係坦誠相見，知無不言，言無不盡既．加上，我唔想之後 Melody 有任何被騙既感覺（此乃個人原則，唔想欠人），所以知其不可為都要為．大家如果唔識死，走去照跟我呢個做法，可以話係九死一生既，而家事先聲明，第時出事唔好怪我呀．）Melody 聽完，停咗一陣冇乜反應，我唔知佢諗緊乜，只好講下笑話打完場，同佢講：所以你都算好彩啦，冇畀機會我追你，唔係可能重慘過梁天來呀．Melody　微微笑，有翻啲反應，證明笑話無論幾時喺女仔身上都係好 work 既．既然 work，就送多幾個笑話佢聽，佢繼續笑，重越笑越開心．講講下，我有啲攰，自己大字型攤咗喺床度，連隨呌下氣．但係 Melody 出其不意走過嚟吱我，我本身唔係好怕吱，但係見佢咁同我玩，我又回敬吱翻佢，唔吱尤自可，一吱佢嬌聲嚦嚦地嗌救命，連叫投降，咁我只好停手．呢個時候，兩個人突然間靜晒，佢眼望我眼，就好似電視劇啲老土橋段咁 Kiss 起上嚟，而我隻手亦開始越嚟越唔規矩......過咗唔知幾耐，激情完嘞，呢個時候我唔知自己平時啲理智去晒邊度，捉住 Melody 雙手同佢講：畀我幫你......幫你離開你男朋友......     Melody 猛力係咁搖頭，停咗陣，再同我講：我係好鍾意好鍾意好鍾意我男朋友既，就算唔同佢一齊，我諗我都唔可能同其他人喺埋一齊......   跟住佢同我是出咗一個比廿三條立法重唔合理既要求:你可唔可以應承我，以後都唔再 Kiss 我呀？　我無奈點一下頭．之後只好同佢講:時侯差唔多啦，我送你去撘車啦．

[ Last edited by attaboy on 2005-10-2 at 10:13 PM ]
作者: edifier    時間: 2005-10-2 08:18 PM

Originally posted by attaboy at 2005-10-2 07:24 PM:
......續前

跟住佢同我是出咗一個比廿三條立法重唔合理既要求:你可唔可以應承我，以後都唔再 Kiss 我呀？
咁都得???
如果我親身經歷過里句說話我都會嚇一跳!!!
作者: attaboy    時間: 2005-10-3 04:15 AM

但我自己當時就冇畀佢呢句嚇一跳，補充小小啦，其實 Melody 重有話佢覺得同我咁做係對佢個 bf 唔住，同埋又講除咗男朋友之外從來未畀其他人鍚過攬過．女仔大部份時候係感性多於理性既，佢地只會按自己既感覺去行事．我知道 Melody 因為當時唔開心，而佢對我又有啲 feel，所以其實只要我肯做主動，佢係好難把持得住，所以佢要求我唔再 Kiss 佢，係為防事情真係發展成四角戀．我好明白佢提出呢個要求（never kiss her anymore）既用心，所以答應佢，佢重好感激咁話多謝我．唉，一個女仔多謝我，唔係話多謝我錫佢，而係話多謝我以後唔錫佢，其實都幾悲哀架．
作者: siredes    時間: 2005-10-3 09:29 AM

我覺得愛情係自私同麻木o既, 所以如果換轉係我, 我可能唔會應承佢之餘反而會再進一步咩添......
不過始終你係一個非常之正直o既人, 所以你咁樣做我都唔覺得意外.
但一路咁睇落去我愈來愈覺得Melody呢個女仔並唔係開頭所諗一樣咁簡單...(直覺)
作者: vampy_boy    時間: 2005-10-3 10:01 AM

老兄﹐
我當年就和你一樣差一點死於一吻之下﹐
劫後餘生﹐
還算福大命大。。。
作者: attaboy    時間: 2005-10-3 04:55 PM

Originally posted by siredes at 2005-10-3 11:29 AM:
我覺得愛情係自私同麻木o既, 所以如果換轉係我, 我可能唔會應承佢之餘反而會再進一步咩添......
不過始終你係一個非常之正直o既人, 所以你咁樣做我都唔覺得意外.
但一路咁睇落去我愈來愈覺得Melody呢個女仔並唔係開頭所諗一樣咁簡單...(直覺)
正直呢自問真係唔係，因為我正極都總有三分邪既．但係我幾時都講求公道，公道在我心目中係凌駕所有其他價值觀既，我做人命可以唔要，但係公道一定要攞翻．同埋，過多幾日我其實又再失守畀 Melody，做唔到我所應承既嘢．所以 Melody 呢單嘢，令我喺好多方面都好失敗．我生平從冇睇錯過人，但係 Melody 係唯一一個令我跌眼鏡既．Didi 當年都有忠告我（但係係嗰晚之後過多四個月既事），話 Melody 絕對唔係我心目中所想咁簡單，但係我都係一次又一次樁個頭埋去，真係一失足成千古恨，今日再回頭己是百年身啦．

[ Last edited by attaboy on 2005-10-3 at 06:59 PM ]
作者: attaboy    時間: 2005-10-3 04:58 PM

Originally posted by vampy_boy at 2005-10-3 12:01 PM:
老兄﹐
我當年就和你一樣差一點死於一吻之下﹐
劫後餘生﹐
還算福大命大。。。
溫柔鄉是英雄塚，能抽身者才是人傑，佩服．
作者: attaboy    時間: 2005-10-3 05:08 PM

Originally posted by yungting0623 at 2005-9-30 10:07 PM:

至於講到女仔呢.....而家連點相處都唔識........仲邊有對象可言.......就算有對象,以小弟既專容.......唔嚇走d人已經執到......
追女仔唔駛靚仔架，但係一定要風趣幽默，口才了得．同埋男人最重要係有本事，你睇楊振寧就係一個好例子嘞．
作者: attaboy    時間: 2005-10-3 05:11 PM

Originally posted by homan~ at 2005-10-1 03:16 PM:


bro,
你講得好arm,

小弟真係冇咩經驗

溝到之後都唔係好知點做.....................

期待你的故事lei~~
多謝你一路咁支持．依你所講，女朋友已經到手，係咪佢有咩投訴呢？
作者: hkcitywong    時間: 2005-10-3 05:29 PM

Originally posted by attaboy at 2005-10-3 04:55 PM:


正直呢自問真係唔係，因為我正極...
似乎你係天秤座的人．．．．．．．


我都係好要求公平既人，但人大左，何謂公平？何謂不義？　有時真係答唔到
作者: attaboy    時間: 2005-10-3 06:08 PM

Originally posted by hkcitywong at 2005-10-3 07:29 PM:



似乎你係天秤座的人．．．．．．．


我都係好要求公平既人，但人大左，何謂公平？何謂不義？　有時真係答唔到
秤就係秤，不過彼瓶不同此秤．我係卡苖唔係童虎．

公道個標準在我嚟講其實好簡單，任你 set 佢個標準係點都冇所謂既，重點係要一以貫之．即係易地而處，位置對調時個標準都係唔會變既．亦即係冇私心，個個平等，(唔係我地泱泱大國行嗰套公道：all are equal, but some are more equal!)咁公道自然喺其中矣．可惜，我讀過一個中國詩人既兩句七言：公道世間唯白髮，貴人頭上不曾饒．講得好啱，個「唯」字係用得好憤慨同悲哀既．即係話除以外都冇嘢公道嘞．
作者: 古文    時間: 2005-10-3 08:45 PM

Originally posted by attaboy at 2005-10-3 06:08 PM:


秤就係秤，不過彼瓶不同此秤．我...
彼瓶不同此秤.......難道是水瓶?
如果係的話, 我都同你一樣

我覺得你有一樣性格 我同你好相似
就係變身........ 不過我變身果時好狼死, 如果口講唔掂 就會郁手
打到條由扒係樹..... 果時好似殺紅左眼咁, 完全失去理智
過後好多人話見到我都怕怕

講返你段古仔, 睇左成個post, 我覺得你個人真係好正直
帶左個女仔上自己屋企, 仲要咀埋都仲可以控制到自己 冇同佢發生關系
真係難得一見既好男人, 如果俾我, 一定"飛琴大咬" 上左佢  哈哈

好想快d 睇埋落去, 你同Melody既發展如何
作者: homan~    時間: 2005-10-3 08:50 PM

Originally posted by attaboy at 2005-10-3 05:11 PM:


多謝你一路咁支持．依你所講，女朋友已經到手，係咪佢有咩投訴呢？
bro, 咁高估小弟呀 ~~
冇女呀 ~~
依家冇溝女啦

前幾日係26fun 睇左篇野
好感動
令小弟知道係溝女之前
都係處理好同屋企人d 關係好d先啦

同埋自問真係唔係一果好既男友
都係睇bro d野學下師先啦
作者: homan~    時間: 2005-10-3 08:52 PM

bro, 好支持你冇同佢咩架

好野ｗｏ，
咁都忍到
好辛苦架ｗｏ　

小既都覺得依ｄ野唔好亂黎
費事ｈｕｒｔ人啦～～
作者: attaboy    時間: 2005-10-3 10:29 PM

Originally posted by 古文 at 2005-10-3 10:45 PM:


彼瓶不同此秤.......難道是水瓶?
...
係.可惜我係水皮座.

實不相瞞，在下成世仔係從未同人動過手打過交既．我知以我既性格，如果出手，真係會同阿小李探花一樣，例不虛發既．當然佢就係百發百中個發，而我就係一發不可收拾個發．亦都好彩，咁耐以嚟都未遇到過我覺得非出手不可既事．古文個「武」字其實右邊係有一撇既，倉頡造字係好有意思，有一撇既「武」字拆開嚟係「止」「戈」，即係話，武力既真正目的係愛嚟制止其他武力既，（美帝阿殊仔出兵打依家瓜就係用呢個理由嘞，但其實係 Copy 我地中國人既智慧既，美國佬成日講 intelligence property ，呢次又唔見佢地畀翻 Credit 我地喎．）希望呢位朋友下次要郁手時，諗下倉頡先生既苦心啦．
作者: attaboy    時間: 2005-10-3 10:39 PM

Originally posted by homan~ at 2005-10-3 10:52 PM:
bro, 好支持你冇同佢咩架

好野ｗｏ，
咁都忍到
好辛苦架ｗｏ　

小既都覺得依ｄ野唔好亂黎
費事ｈｕｒｔ人啦～～
其實重有一個原因既，我覺得 Melody 係感情上有問題，唔開心，想搵個人幫佢發洩，佢絕對係冇諗過後果就去挑逗我，我唔想佢之後後悔時痛不欲生，所以先冇幫佢鑄成呢個大錯啫．（我本人對 SEX 唔係睇得咁 serious，如果個女仔係睇開既，我係唔介意奉陪）

[ Last edited by attaboy on 2005-10-4 at 12:57 AM ]
作者: yungting0623    時間: 2005-10-3 11:03 PM

Originally posted by attaboy at 2005-10-3 05:08 PM:


追女仔唔駛靚仔架，但係一定要風趣幽默，口才了得．同埋男人最重要係有本事，你睇楊振寧就係一個好例子嘞．
自問自己既口才都唔算差....但總係一見到女仔就會食晒螺絲....乜都講唔出....至於本事,小弟暫時都仲未有.......

講番你個故仔.....睇過各位既分析同你既補充之後.....開始覺得melody唔係想像中咁單純......女人果然係一種難以捉摸既動物.........
作者: attaboy    時間: 2005-10-3 11:17 PM

Originally posted by yungting0623 at 2005-10-4 01:03 AM:


自問自己既口才都唔算差....但總係一見到女仔就會食晒螺絲....乜都講唔出....至於本事,小弟暫時都仲未有.......

講番你個故仔.....睇過各位既分析同你既補充之後.....開始覺得melody唔係想像中咁單純......女人果然係一種難以捉摸既動物.........
如果本身口才冇問題，咁就易辦啦．咁你可能只係少同女仔溝通，冇經驗啫．以前 Minnie 成日話我講嘢串到死，係女仔都唔鍾意同我講嘢啦，重叫我去識多啲女仔．係呀，你冇睇錯，我當時既女朋友叫我去識多啲女仔喎，神唔神奇．但係以前冇領到 Minnie 情，依然唔去騷啲女仔，直至出嚟做嘢冇辦法至去同女仔熟落．首先最好搵啲好肯幫人又對佢唔會有 feel 既嚟練習．我就係搵施莉亞，Didi 同喺 OZ 識既一個女仔fren 嚟練．傾得多囉，咪知佢地原來講邊啲嘢會介意，講邊啲嘢又會好雀躍喎．就係咁，今日我對住不同類型既女仔都應付裕餘嘞（指傾偈方面）.
作者: yungting0623    時間: 2005-10-3 11:33 PM

Originally posted by attaboy at 2005-10-3 11:17 PM:


如果本身口才冇問題，咁就易辦啦...
但好難知邊d會冇feel架喎......
作者: homan~    時間: 2005-10-5 02:43 AM

bro~,

attaboy 講得好好
同女溝通要吹多d水架

想小弟中學之時
咩都唔曉
d女都俾人溝晒啦

直到預科
全班得幾果仔
有成廿幾條女
果時好似上溝女特訓班咁
開晒曉

大學仲多女
亦令小弟增廣見聞
技巧不斷進步

bro, 同女吹多d 水就知架啦
作者: homan~    時間: 2005-10-5 02:46 AM

bro,

聽你咁講,

Melody應該係超勁既高手 !!!!!

小既到依家都未見過.............
look forward ur sharing~~~
作者: attaboy    時間: 2005-10-5 04:57 AM

Meldoy 絕對係我見過咁多女仔最厲害既一個，佢本事在永遠都可以令男仔不知不覺中佢招．就我間舊公司，以我所知，除咗我死係佢手上外，之後起碼重有四五個男同事一齊陪葬既．

同埋記住，女仔對唔出聲既男仔係唔感興趣既（除非好靚仔或者有其他特別本事）．所以要受女仔歡迎，最好下吓苦功閉關練習下做楝篤笑，我個人係反覆睇晒老黃既楝篤全集既，其中「跟住去邊度」同「楝篤雙打」講女仔嗰 Part 係最正既．
作者: attaboy    時間: 2005-10-5 06:43 AM

墨記今年輸咗個馬位添.

http://www.26fun.com/bbs/viewthread.php?tid=83828

[ Last edited by attaboy on 2005-10-5 at 08:44 AM ]
作者: attaboy    時間: 2005-10-6 08:54 PM

......續前

跟住個禮拜一，第一日返新 office ．返到公司，將肯尼士賀我殺入 TST 既精美綱製卡片座放喺自己枱上當眼處（肯尼士送畀我時，施莉亞話好靚，好想據為己有，但係肯尼士認真夠朋友，最終都交翻喺我手），跟手將自己既 business cards 放上上面．睇落自己都好滿意．嗰朝早，Melody 又過嚟我地 team （搬咗 office 後，Melody 個 team 同我個 team 變咗天涯海角，再冇以前喺舊 office 咁可以成日偷偷望佢呢支歌仔唱嘞）．Melody 永遠行過我位，都會停留一陣同我傾幾句，當佢見到我個卡片座時，佢兩眼即時發光，講咗句：嘩！靚喎！　　跟住問都冇問我，自己攞咗個卡片座返佢個位擺．當時我心裡面好不滿：第一，我唔鍾意其他人掂任何屬於我既嘢，就算係 Melody 都唔會例外．；第二，件禮物係我好朋友送既，係代表我同肯尼士之間既情誼，就算 Melody 佢出聲求我，問我要，我都一定唔會畀既，如果我咁樣借花敬觀音法，係對朋友不義，係一件打死都唔應做既事嚟；第三，阿 Melody 小姐究竟想點呢？莫講話我同佢唔係男女朋友，就算係，都唔可以咁樣自把自為呱．但係我都冇問佢攞翻，因為做男人，機會女人可以失，但係人格風度就幾時都唔可以丟既．之後 Melody 成日再借頭借路喺我面前叱啅咁轉，令到 Didi 好奇怪問我究竟咩事？我都好想有人能夠話我聽係咩解究喎？乜我嗰晚喺屋企同 Melody 唔係交代得好清楚架啦咩，唔通我啲表逹能力差成咁，唔會呱，話晒高考我中國文化口試都攞 B 個喎．不期然學起白頭魯當年咁大問三聲：怎麼辦？怎麼辦？怎麼辦？　　過多兩三日，呢個問題都係幾困擾我，我卒之忍唔住打電話約 Melody 食飯．當晚放工，同佢兩個人去咗 CWB 食小小嘢．之後我同佢講：如果你有時間，陪我去一笪地方吖? Melody 問都冇問去邊度，就爽快答話：好呀！（下次我諗要試下問：如果你有閒錢，不如畀晒我啦？希望答案都係一樣就冇死啦．）我同佢撘２３號巴士，去到我屋企樓下．呢次 Melody 終於知道我要帶佢去邊嘞：各位冇估錯，又係我屋企！　撘 lift 上樓，去到門口，我醒起呢次咁早，阿媽實未瞓，唔知 Melody 會唔會怕醜，問佢：我阿媽係入面，你驚唔驚見到佢呀？ Melody 個樣好猶疑，想答唔答之間緩緩點頭．咁我話，你喺到等陣先，我入去打點一下．連隨做個不考子，犠牲咗個呀媽，同睇緊電視既佢講：媽，你唔好問，幫幫手，入廚房一陣先，我叫你出嚟先好出嚟．　　好在我阿媽不嬲都幾錫我呢個衰仔，佢真係重乖過做女嗰陣時，自動自覺行咗入廚房，但邊行邊口翕翕：搞乜鬼呀？　　我即時偷運咗條人蛇 Melody 入我房，再向廚房大嗌：媽，得啦，你可以出嚟啦．　　轉頭入房，見 Melody 好熟架步咁心情輕鬆地坐咗係窗台．我又好似之前咁，面對佢坐咗喺張櫈度．跟住馬上轉個嚴肅樣開始我既講辭：我唔知之前我同你講既嘢，你係咪有咩地方有誤會．今晚我想再講清楚啲．我都同你講過我係掛住我以前個 gf，加埋你又同男友糾纏不清，你亦同我講得好明白係離開唔到佢．咁我可以開解你既已經開解晒，可以幫你既亦己經做晒......連唔應做既都做埋......跟住落嚟可以救你既就只有時間同你自己......我再冇嘢可以做架嘞．所以我諗以後喺公司我地最好保持翻正常同事既關係，唔係畀人講閒話......我就話由細到大聽慣閒言閒語啫，但係我諗你絕對接受唔到嗰啲說話架，我諗你明架呵？ Melody 一路唔出聲，聽到呢度，咬咬唇，樣子百般委屈咁望住我．我心諗：喂！咪喊呀阿姐，女人一喊我唔識收科架．只好連隨安慰翻一兩句；唔駛唔開心架，我咁講都係為你好啫．我唔係唔再理你，只係再唔可以好似之前咁喺公司擺明車馬成日陪住你，但係你幾時要幫手，出句聲，我就會喺你身出現架啦！Melody 聽咗呢句，好似食咗止喊丸咁，雖然冇乜表情，但睇嚟心情好翻啲嘞．我趁呢個機會送咗佢落樓截的士．望住架的士遠去，我百感交集，思潮起伏不止．第二日一返工，捉住 Didi 講：我知公司其他同事對我同 Melody 有好多忖測，有好多說話周圍飛．我就冇乜所謂，我做人只要自問府仰無愧，我係唔得閒理人點睇．但係 Melody 始終係女仔，如果你聽到有人講我同佢閒話，就麻煩轉告一聲，所有嘢都係我既問題，唔關 Melody 事既．　　　 Didi 聽完我講，面有加許之色，再用佢 Didi 腔講：絲（知）到啦．　　過咗陣， Melody 手捧住肯尼士個卡片座送翻畀我，輕聲講：個卡片座都係畀翻你啦！　　跟住就行咗．我當時諗，件事咁樣完結未嘗唔係一個對大家既傷害都減到最低既方案，點知過多一個禮拜，下一回合又失驚無神開始過......

[ Last edited by attaboy on 2005-10-6 at 11:23 PM ]
作者: homan~    時間: 2005-10-7 02:04 AM

Originally posted by attaboy at 2005-10-6 08:54 PM:
......續前

跟住個禮拜一，第一日...
bro,

仲記得咁清楚既 ????
好野wo

小弟d溝女過程已經唔記得晒啦
作者: attaboy    時間: 2005-10-7 03:48 PM

此之謂刻骨銘心，要忘記亦非易事......
作者: edifier    時間: 2005-10-8 08:16 AM

Originally posted by attaboy at 2005-10-6 08:54 PM:
......續前

因為做男人，機會女人可以失，但係人格風度就幾時都唔可以丟既...
這句good!!!
作者: vampy_boy    時間: 2005-10-11 09:32 PM

Originally posted by attaboy at 2005-10-3 04:58 PM:


溫柔鄉是英雄塚，能抽身者才是人傑，佩服．
只怕換來半生污名﹐
啞子吃黃蓮。
才二十有二﹐
過日子真不易。
作者: attaboy    時間: 2005-10-13 04:55 PM

Originally posted by vampy_boy at 2005-10-11 11:32 PM:

只怕換來半生污名﹐
啞子吃黃蓮。
才二十有二﹐
過日子真不易。
唔係好明什麼半生污名啞子黃蓮喎......贈君一句:「細推物理須行樂，何用浮名伴此生。」
作者: siredes    時間: 2005-10-14 12:14 AM

阿at你最近好少"交稿"喎, 吊晒我o地胃口呀...:cool:
作者: johnny1982    時間: 2005-10-14 03:04 PM

pls post the story again,i really want to read it again
作者: attaboy    時間: 2005-10-14 04:10 PM

Originally posted by siredes at 2005-10-14 02:14 AM:
阿at你最近好少"交稿"喎, 吊晒我o地胃口呀...:cool:
吊人癮啲咁缺德既嘢，我係好少做既．之不過而家係我三十年以嚟最忙既時候．盡人事啦，重有好長篇幅先完結，希忙盡量抽空完成．
作者: attaboy    時間: 2005-10-14 05:33 PM

......續前

過咗個禮拜，有日放工行到屋企樓下，突然間電話响，Melody called 我．佢問我喺邊，我話差唔多到屋企啦，佢話咁冇嘢．嘻，雖然當年我都重未係好明啲女仔諗乜嘢，但係聽佢咁講一定有事，同佢講：喺咪有事呀？佢答：你可唔可以出出嚟？我話：可以......咁你而家喺邊呢？佢話喺金鐘 PP 廣場，咁我就即飛的去同佢會合．一見到佢，個樣幾 down，我知又係同男友出問題，先同佢講：食咗嘢未？未！咁食先至講．跟住同佢喺麥當當一人食個不瘦降餐．食緊既時候，佢電話响，見佢拿住個電話唔出聲，一路聽對方講，但佢個表情就好呆滯．五分鐘......十分鐘......十五分鐘過咗，Melody 都係保持同一姿勢，亦都冇乜點出聲，只係間唔中哦，係咩，唔係囉咁回應，我唔駛估都知對頭電話係佢 bf 嚟，因為除咗我哋偉大祖國啲官僚會咁應電話外，普天之下就只一對拖友會咁樣對話．見 Melody 都好似重有排依依哦哦，我同佢打個眼色去洗手間，去完返嚟，見佢講完嘞．問佢咩事，佢吞吞吐吐，我話咁唔好講住，行陣場場先，兩個人就一路喺個全港數一數二大既 Shopping Mall 度做巡場．行咗一陣，佢開始入正題嘞，佢話好唔開心，我問佢點解，佢話因為佢男友話要殺佢！　　吓！唔係呱......如果要殺都係 Melody 買兇殺佢 bf 符會刻情架喎，點解倒翻轉，對人唔住嗰個可以咁大聲話要殺人呢？問佢乜事，佢話因為佢 bf （辜且畀個名佢叫阿神啦，神神化化個神）成日頭痛，以前阿神一頭痛，Melody 會好似 MTR 咁，話咁快就去睇佢，但係因為之前發生既事，令到 Melody 唔係好想見佢，前一晚阿神又打電話畀 Melody 話頭痛，但係 Melody 話唔得閒去睇佢，咁阿神就好似佢個名咁大發神經，喺咁鬧 Melody 唔理佢，兼且話要殺死佢．Oh! 呢個時候我知世間上原來重有人黐綫過區區在下，咁既事都做得出？阿神係咪男人嚟呢？我心裏問．雖則我發起神經嚟都同佢不相上下，但係我發作親都係有充份理據支持既，但係呢一次，我諗問十個人，不論男好女好，都會覺得我係冇幫阿神安錯名既．再問 Melody 喺咪好驚自身安全呢？佢話唔係，之但係覺得個心好實，好 hurt，因為阿神從來未對佢講過咁既說話．唉！咁我都冇計架，叫 Melody 放棄抽身佢又話唔得，咁兩個（應該係三個）人係都要糾纏不清，累鬥累，我作為局外人可以做既幾乎係零．唯有好言安慰 Melody，叫佢唔好咁唔開心，等阿神冷靜落嚟，就會冇事．同 Melody 行到 PP 廣場柵閘，佢都好似唔想返屋企，咁唯有繼續陪住佢啦，唔係佢如果真係睇唔開做咗傻事（見得太多女仔一為情唔開心，就會做啲比我癲起上嚟更難預計既嘢嘞），咁我一世都會唔安樂，唔係因為我鍾意 Melody，而係自細中咗古龍毒，佢筆下既小說主角永遠都唔會見死不救（even 係敵人）既，重通常會講（大概）：我救你只因為你係一個人，係人就有生存既權利．我係幾 buy 龍哥呢個對做人邏輯既．所以繼續留喺 Melody 身邊......（當晚未完，待續）
作者: vampy_boy    時間: 2005-10-15 10:50 AM

情殺??????????????
你既故事果然值得和大家分享。。。
作者: vampy_boy    時間: 2005-10-15 11:05 AM

Originally posted by attaboy at 2005-10-14 04:10 PM:



吊人癮啲咁缺德既嘢，我係好少做既．之不過而家係我三十年以嚟最忙既時候．盡人事啦，重有好長篇幅先完結，希忙盡量抽空完成．
工作要緊﹐
等一下死不了。
作者: Elsie    時間: 2005-10-16 01:43 PM

你個 story 真係好吸引呀~
慢慢諗點寫啦~
繼續追喔!
作者: homan~    時間: 2005-10-17 12:51 AM

Originally posted by attaboy at 2005-10-14 04:10 PM:



吊人癮啲咁缺德既嘢，我係好少做既．之不過而家係我三十年以嚟最忙既時候．盡人事啦，重有好長篇幅先完結，希忙盡量抽空完成．
bro

做野緊要ma~~

加油啦!!!!
作者: homan~    時間: 2005-10-17 01:01 AM

Originally posted by attaboy at 2005-10-14 05:33 PM:
......續前

過咗個禮拜，有日放工...
bro~

你講開小既又有野分享下

小既同前女友係金鐘pp果度食m記
佢既ex-bf死心不息(條仔唔想散)
又係係電話講數
d reason 又係好冇理
條女又係唔開心
條仔又係話要殺人, 要你冇好收場之類
不過之後冇行場je

bro, 大家d 遭遭遇好似wo

[ Last edited by homan~ on 2005-10-17 at 01:12 AM ]
作者: homan~    時間: 2005-10-17 01:10 AM

Originally posted by attaboy at 2005-10-14 05:33 PM:
......續前

過咗個禮拜，有日放工...
下~~

咩d女咁問係有玄機架 ????
小既尋日前先有單咁既情況
果女仔又係唔係咁開心
跟住係電話度吹左好耐水tim

................

果商場同屋企都係十分鐘路程
真係有位都唔識上

多謝bro 塞錢入小弟果袋呀
作者: attaboy    時間: 2005-10-20 07:35 PM

......前篇重新整理發表

過左個禮拜，有日放工行到屋企樓下，突然間電話響，Melody called 我．佢問我o係邊，我話差唔多到屋企啦，佢話咁冇野啦．He he，雖然當年我都重未完全明白o的女仔諗乜野，但係聽佢咁講，一定有事啦，問佢：係咪有事呀？佢答：你可唔可以出出黎？我話：可以......咁你而家o係邊？佢話o係金鐘 PP 廣場，咁我就即刻飛的去同佢會合．見到佢，個樣 down down 地，唔駛問又係男友問題，先同佢講：食左野未？未！咁食o的野先．跟住同佢o係麥當當一人一個不瘦降餐．食緊既時候，佢電話響，見佢拿住個電話唔出聲，一路聽，一路個表情都好呆滯．五分鐘十分鐘十五分鐘過左，Melody 都係保持同一姿勢，亦都冇乜點出聲，只係間唔中「哦」，「係咩」，「唔係囉」咁回應，唔駛問都知對頭係佢 bf，因為除左我地偉大祖國o的為人民服務既官員會咁應電話外，普天之下就只有一對拖友會咁樣對話．見 Melody 都好似重有排依依哦哦，我同佢打個眼色示意去洗手間，去完返黎，傾完勒．問佢咩事，佢欲言又止，我話咁唔好講住，行陣商場先，兩個人就o係全港數一數二大既 Shopping Mall 度做巡場．

行o左一陣，佢開始入正題，話好唔開心，我問佢點解，佢話因為佢男友要殺佢！　　o下！唔係呱......咁反高潮？照劇情應該係 Melody 買兇殺佢 bf 先正路喎，點解倒翻轉，對人唔住O個個可以咁聲大大話要殺人呢？問佢乜事，佢話因為佢 bf （辜且畀個名佢叫阿神啦，神神化化個神）成日頭痛既，以前阿神一頭痛，Melody 就會好似 MTR 咁，話咁快就去睇佢，但係之前發生O左咁多事，令到 Melody 唔係好想見佢，前一晚阿神又打電話畀 Melody （我諗：詐）話頭痛，但係 Melody 呢次冇以前咁順擹，唔去睇佢．咁阿神就應O左佢個名，大發神經，係咁鬧 Melody 唔理佢，兼且話要殺死佢．Oops! 呢個時候我先知世間上原來重有人黐線過區區在下（吾道不孤矣），咁既事都做得出？阿神係咪男人黎呢......我心裏問．雖則我發起神經黎都唔輸蝕過佢，但係我發作親都係有充份理據支持既（至少我自己搵到 reasons support 啦）．但係呢一次，我諗問十個人，隨便男好女好，都會認同我係冇幫阿神安錯名既．再問 Melody 係咪好驚自身安全？佢話又唔係，之但係覺得個心拿住拿住，好唔開心，佢重話阿神從來未講過O的咁既說話．唉！咁我都冇計架，叫 Melody 放手抽身佢又唔制，咁兩個加一個係都要糾纏不清，累鬥累，我作為局外人可以做既幾乎係零．唯有好言安慰 Melody，叫佢唔好咁唔開心，等阿神冷靜落黎，就會冇事．

同 Melody 行到 PP 廣場柵閘，佢都好似唔想返屋企，咁唯有繼續陪住佢啦，唔係如果佢真係睇唔開做傻事（見得太多女仔一為情唔開心，就會比我更癲），咁我一世都會唔安樂，唔係因為我鍾意 Melody，而係自細中古龍毒中得太深，佢筆下既主角永遠都唔會見死不救（even 係敵人），重會大條道理話：我救你只因為你係一個人，係人就有生存既權利．　　　Hm......我不嬲都係幾 buy 龍哥呢個做人態度既．所以繼續留O係 Melody 身邊．但係夜麻麻同佢兩個人做乜好呢？真係考起．我識去既地方都同佢去勻啦，諗黎諗去都唔知跟住去邊度，最後都係決定同佢遊車河．常言道名車美人，美人己有，架車梗係唔可以失禮，我物色左架過百萬港元，普通人有錢都冇可能買到既名車載佢，而且重有專業司機接送添，呢架名驅就係之前提過既......２３號巴士勒，哈哈哈．

O係車度， Melody 係咁講佢讀書時o的趣事我聽，佢話以前學生妹時成日扎馬尾，佢O的同學就周不時整蠱佢，趁阿 SIR 行過佢隔離時嗌佢，等佢擰頭發起條辮辦中阿蛇......同佢講講下，車到蒲飛路總站，唯有落車，見佢意猶未盡，只好繼續陪佢行．因為我屋企就o係附近，我就好自然帶佢往家裡方向走．行到我屋企樓下，我話：我行到有o的累，我想上去坐陣抖抖．諗住 Melody 聽到會乖乖地自動返歸，點知佢好似的忠實 Fan 屎咁係都唔放過我，同我講：好呀，我都想坐下．咁我又再一次帶佢返屋企.

上到去，入房，攞野飲畀佢，坐低，傾計．傾傾下，歷史又再重複，突然間我同佢靜晒，你眼望我眼，老土既劇情好似又要發生勒，但係有左上次既經驗，呢次我有翻O的理智，懸崖立馬咁同佢講：我應承過你既野一定會做既......但係講完左，佢重係脈脈咁望住我，唔好咁呀，我雖然有需要時係可以好冷靜，好理智，但係我始終係都係一個人，唔係電腦，我身體裡面除左０同１外，都重有感情既成份既，我......我......我卒之又同佢......     再次失守畀佢後，佢自疚咁話：我唔知自己做緊乜......覺得好對我男友唔住......　　　我一聽火都黎埋，忿忿不平，同佢講：咁你男友又好對得你住囉喎？　　Melody 無言低頭，我只好講：算啦，唔講呢o的勒，我送你撘車啦．

第二日，我 Burn 左張 Audio CD 畀 Melody ，落左幾首心水歌當點畀佢聽，尤其有一首 Print 埋歌詞叫佢留意，希望佢早日從呢個惡夢中瞓醒過黎啦．



夢醒時分(迪克牛仔版)

曲：李宗盛 | 詞：李宗盛 | 編：迪克牛仔

你說　你愛了不該愛的人
你的心中滿是傷痕
你說你犯了不該犯的錯
心中滿是悔恨

你說你盡了生活的苦
找不到可以相信的人
你說你感到萬分沮喪
甚至開始懷疑人生

早知道傷心總是難免的
你又何苦一往情深
因為愛情總是難捨難分
何必在意那一點點溫存

要知道傷心總是難免的
在每一個夢醒時分
有些事情你現在不必問
有些人你永遠不必等

[ Last edited by attaboy on 2005-10-20 at 09:47 PM ]
作者: fatkinglet    時間: 2005-10-22 08:05 AM

Love your story, couldn't stop myself reading every word you wrote since i started reading it. Hopefully, we would be able to read the part that how Melody played around your feeling soon. so excited!
作者: attaboy    時間: 2005-10-28 02:18 AM

......續前

跟住個星期六，因為前一日做緊個 urgent project，晨早起身返工司去做埋佢．途中， Melody 又 called 我，問我喺邊度，我話返緊公司，佢話佢又返．當時我都唔 sense 到有咩唔妥，以為佢咁啱手頭有嘢未做完想搵人陪約埋一齊返，都冇去深究．返到公司，得我一個人，埋位做嘢．過冇耐，Melody 返到，各自各做嘢．過咗陣， Melody 走埋嚟，冇啦啦掃冧晒我枱面既嘢，我開始有不祥預感，因為 Melody 平時係超級斯文既，極唔高興都只會係唔出聲，從冇見過佢咁失常，做啲咁失禮既行為．

問佢又咩事，佢嗚呼哀哉回答：我男朋友話要自殺呀！　　　　吓，又嚟呀？我登時好懷疑阿神其實係女人嚟，因為呢啲一兇二罵三要死我平時絕對只會係喺女人身上先見識到既啫．當下安慰 Melody 話：冇事既，佢講下啫，唔會真係要去死既．　　　Melody 則話：但係我好擔心呀，怕佢真係有咩事呀！　　我話駛咩擔心吖，一個人如果真係立心要死，係唔會同人透露既．同得你講，只不過係你博同情，博你閞心啫．

順帶一提，阿神其實係同我同屆，同年考 Cert 既，我有個羅記舊書友係佢大學同學．阿神喺學界係頂班人馬，年年做船主．所以我覺得阿神只不過自尊心作崇，接受唔到被人飛，出埋啲女人手段博 Melody 回頭．

見 Melody 個樣都好似唔係好放心，我話：不如你坐住喺雷蒙個位先，我要搞埋個 Proj. 先再你講．　Melody 都唔想阻我做嘢，自己坐埋雷蒙位繼續飲泣．

當我做做下嘢時，公司個 Proj. Manager 彭美拉返到，問我做好未．我話差唔多啦，重爭少少就得．呢個時候，彭美拉個樣開始有異，側側身行過雷蒙位望一望，然後好尷尬咁講：我一陣先再過嚟搵你．　　唉，唔駛問，整喊 Melody 呢隻死貓大餐又係無料奉送咗畀我．但係解釋最無謂，問心無愧係最實際．立即趕快完成埋手頭既嘢，交咗 deliveries 畀彭美拉.

返去睇下 Melody　，重喊緊，我同佢講：如果你真係擔心既話，我陪你去睇下阿神啦．不過我寫包單，佢係死唔去既，如果個天咁有眼，佢死得去，我無條件同佢墊屍底！
作者: siredes    時間: 2005-10-28 09:50 AM

請恕我直言, 我覺得Melody同佢男友兩個, 都係有D神經質...
雖然你為人火爆, 但起碼你D行為係正常, 唔似佢兩個咁樣...



歡迎光臨 娛樂滿紛 26FUN (http://26fun.com./bbs/) Powered by Discuz! 7.0.0