MaxFigo

我認為係車路士

其他熱門強隊都各有隱憂

皇馬今季新帥上任，球員同新領隊都要有一段適應時間
加上皇馬陣容大變，例如碧咸、卡路士、雷耶斯走左，皇馬來季進攻方式會點變？
巴迪斯達返左黎，係棄用？定留用？留用的話，比佢踢防中？攻中？
定係前鋒？做尹佬拍擋？定只係替補？
後防問題，加入梅斯達同柏比兩人，係咪就足以解決一切？
雖知呢個問題連世界足球先生簡拿華路，都未能給予大家一個滿意o既答案
單憑皇馬熱身賽對住漢諾威，都比人炒0:3，已略知一二
照現今皇馬陣容黎睇，增兵行動肯定未完，但問題係，咁少o既季前準備時間，是否足夠？
雖說穩定表現係淘汰賽唔係話最重要，
但若果聯賽失利，唔多唔少都會影響到歐戰表現，是好是壞亦無定數

至於AC米蘭，一季過去，代表其老人防線問題又再嚴重一D
尼斯達退出國家隊無疑會提升佢係AC表現，但佢拍擋又會係邊個？
仲係馬甸尼？定改用卡拉錫、邦利拿？
前者年紀又老一年，狀態成疑；後兩者則是質素問題....
而前鋒線問題仍懸疑未決，奧利維拉離隊，
老將恩沙基相信只會係關鍵時刻上陣o既後備殺手
基拿甸奴可以回復到邊個程度亦係疑問
只靠朗拿度一人，以佢體能，同時支撐意甲、歐聯兩面戰線，可以嗎？
去季只踢半季意甲，每個禮拜一場，尚可應付，交出表現
但長期征戰如何，又係未知之數

曼聯嗎...明顯費sir已有一個好長遠o既計劃，協助呢支球隊成長
但發展卻過份集中於中前場
無疑曼聯進攻面之廣及攻擊手o既質素令人聞風喪膽
夏格維斯o既加盟亦有助增強中場截擊力
但問題又回歸到中後場板凳深度不足
曼聯只有一名正宗防守中場，一旦夏格維斯傷出，曼聯中場截擊力又會減弱
而中堅方面，維迪、費迪南兩條大杉固然可靠，但替補名單卻令人騰騰震
無論布朗、奧沙、伊雲斯、比基、森遜，都難給予人十足信心
軒斯勢將離隊，更加劇左問題

車路士今季就幾個位置對症下藥
賓希姆、薜維爾，同今日終獲發工作證o既阿歷斯
令中後場板凳深度大大提高
加上摩帥揚言來季會重用賴以成功的433
一眾車路士舊將適應上唔會有太大問題
而去季的442亦已演練足一年
故此車路士係陣式改變上o既彈性會高好多
一旦舒夫真高、波歷克狀態唔好，便踢433
祖高爾、洛賓有傷，就踢442
人腳充足，加上陣式多變，睇怕今季係車仔收成期

黑馬仍然會係華倫西亞、利物浦
華倫去季係備受傷兵困擾下
仍打入歐聯8強，聯賽亦一路排係前4
若今季傷兵減少，加上希古拿、希迪布蘭加盟，代替兩員老將艾耶拉及簡尼沙里斯
唯一擔心係希迪布蘭歐戰淘汰賽經驗淺，未知會否影響歐戰表現

利記陣容未有大變，
F.拖利斯預計係歐戰可發光發熱
但問題係利記來年重點，究竟會放在聯賽上，與曼聯、車仔爭一日之長短？
定放係歐戰上，爭取再入決賽，將會好影響大局


[ Last edited by MaxFigo on 2007-8-3 at 01:48 PM ]

MaxFigo

差d唔記得巴塞....
來季重點將會係如何分配4條煙o既工作
列卡特曾揚言會盡出4名球員
換言之中場配置將會變成
沙維、耶耶托尼、朗拿甸奴
迪高勢將被棄用
雖知迪高o既存在，唔多唔少減輕左後防負擔
好多人認為迪高表現不及波圖時代搶鏡
我卻認為迪高只係演化為球隊無名英雄
耶耶托尼加盟無疑可以增強中場截擊力，但又是否足夠？
沙維、恩尼斯達明顯攻強於守，朗拿甸奴更加唔駛講
配合巴塞鬆散o既防線，縱使米列圖加盟，但未有效力大球會經驗o既佢，未必幫得到太多
從佢代表阿根廷係美洲杯o既演出，已經扣哂分
只怕來季巴塞前面入埋唔夠輸

若列卡特懸崖勒馬，收起伊度奧
但亨利最佳位置係左邊，踢法上亦較伊度奧更喜歡上腳，
要佢打正中，威力肯定大減
到時各球員又要重新適應巴塞新o既攻擊模式
故此先會睇淡巴塞來季係歐聯o既前景...

[ Last edited by MaxFigo on 2007-8-3 at 01:51 PM ]

MaxFigo

Originally posted by 自由神 at 2007-8-3 10:57 PM:

簡尼沙里斯只係退居後備，無離隊！
所以華西o係重要時刻都仲可以有佢頂住！

哈，我話代替o者，無話佢走左
問題係門將呢個位置唔可能使用輪換制
杜迪克經驗同樣老到，雪完一年半載出返黎一樣手腳僵硬，變左黃大仙