bbsex

小弟身為德國隊fan，由90年世界盃支持(撐)到而家，實在有D感慨 ... ...

淨係講條後防線：自從畢圖特、巴治禾、路達、高拿、布林美、希馬、馬圖斯、森馬等名將退出左，無論係邊個做領隊，都砌唔番條同級數既後防，當然唔可以怪哂個領隊，因為實在限米煮限飯。本來以為後起既連基、基爾、路禾尼、禾恩斯、巴布、薛基等可以頂得下，但係係近年既大賽中佢地既功力大家都有眼見(講係都心傷)，如果唔係走線好，02世界盃可能一早已經返屋企 ... ...

而家第一偶像奇連士文起用一班新人，個個20出頭，講希望一定有，潛質有幾大而家唔敢咁快下定論，但係坦白講佢地絕對去唔到世界一、二級既水平。我明白奇連想搵機會換班，唔通下下搵番禾恩斯同連基出黎頂咩！ 所以真係針無兩頭利 ... ...

另外間中搵D中場頂閘位呢下我真係好有保留：係維拉打中場好好地既希斯貝加而家打左閘，除左貪佢係左腳、射波出波有番咁上下，根本唔知佢仲有咩好可以打呢個位，防守唔強，位置感又無；本來可以打呢個位既其實仲有拉奧同拿姆，點知第一個唔生性，去到拜仁唔單止頂唔到李沙拉素個位，自己仲越打越沉；第2個又係有少少尷粗黎，右腳打左閘，大家有踢開波都知咁樣好無著數，下下都要係人地底線扣番右腳出波，做多一、兩次係人都睇得穿啦。而02世界盃搵芬寧斯打右閘都仲算可以 ... ... 但係呀偶像，世界上有幾多好似森保達呢Dcase呀？

唉~~ 希望偶像可以係今年內砌到條似樣D既防線啦！ 咪先下年世界盃都好危

[ Last edited by bbsex on 2005-6-17 at 12:44 PM ]