秋葉林

非常認同雷公嘅分析

依家睇番轉頭，其實雲格早响舊年已經有所部署。舊年季初果陣，雲格已經開始試用法比加斯同法明尼兩個新仔，當時啲人仲猛話雲格幾大膽，將條中場線交俾兩個新仔。事實證明呢兩個新仔雖則未去到世界級，但係要應付本土聯賽絕對唔係問題。

有咗呢兩個新仔做 backup，巴迪斯達同希比又有啲眉目，自然可以安心响條中場線度開刀。第一個清韋拉，我覺得又未必真係為咗立軍威，最大嘅原因都係韋拉早有異心，等合約滿咗俾佢自由轉會咪仲蝕，既然依家賣得好價錢就啪啪聲送佢走啦，去舊迎新對球會長遠發展絕對有利無害。

我之前响其他 post 都有提過，通常一支球隊唔會連續勁多過五年，原因就係同一批球員唔可能維持到咁長時間，換血期間球隊必有反覆。雲格有費 sir 做樣板，自然唔會好似佢咁拖泥帶水。下一步我都估會係亨利，因為雷耶斯同雲佩斯都有唔錯嘅表現，可以做到 backup 嘅效果，如果揾到個世界級年青前鋒加盟，我係雲格就即刻送亨利一程喇，我估佢依家最少都值 2,000萬磅掛。至於後場方面，似乎仲未有人做到 backup，加上後防球員通常都可以打到三十幾歲，所以個人覺得蘇金寶應該可以留一留。

話雖如此，嚟緊呢兩年曼聯同阿仙奴都仲處於換血階段，車路士應該仲可以繼續威落去，可以威脅車仔嘅球隊我睇好利物浦，班西班牙兵團已經開始漸漸成形喇。

[ Last edited by 秋葉林 on 2005-7-19 at 12:16 PM ]

秋葉林

講真我覺得車仔阿油王買人果陣有啲想學雲格果套買人哲學 --- 入啲年青有為嘅貨。不過論眼光就無雲格咁好喇：

雲格會買啲後生但係未好出名嘅新仔
油王就會買啲起晒朵嘅後生仔

未出名嘅新仔得一個字，「平」囉，不過就有啲風險。起晒朵嘅後生仔好在可以即食囉，不過就貴啲，仲有機會係早熟早殘果隻

無辦法啦，大家 budget 唔同嘛，你又吹油王唔脹