基斯普掃帚星宿命去到邊黑到邊

Jeans

基斯普掃帚星宿命去到邊黑到邊
09/06/2005


基斯普球品同球技都好，球迷唔鍾意佢只因佢黑仔！呢位阿根廷射手天生冇捧杯命，國際大賽唔在講，就連力球會都好少贏得重要錦標，最叻仔只係九九年幫帕爾馬贏過意大利杯，但之後六年有佢在陣名牌球隊都與重要錦標絕緣，基斯普可謂去到邊衰到邊。

基斯普二○○○年高價轉會拉素後，拉素即刻衰落，基斯普「初露鋒芒」，及後轉會國際米蘭，大家黑鬥黑又點會有好結果，上季轉戰英超，加盟有水喉射住車路士，以為泊碼頭有運行，點知又係陀衰家，車路士四大皆空，跟住莫連奴上任知佢有「黑底」，將佢踢返意甲，借畀AC米蘭。  

莫連奴醒目唔要佢
  

莫連奴果然神機妙算，基斯普離隊後，車路士便贏得聯賽冠軍。AC米蘭當初以為唔使錢執到好喇，季中基斯普確係幾威水，頻頻入波，但後尾佢又「發功」，AC聯賽大戰祖雲達斯輸波，將冠軍拱手相讓，你都可以話場波佢冇出場，唔關佢事，但歐聯決賽就唔到你唔信，基斯普正選出場上半場省兩粒，相當威風，但到頭都係喊住返屋企，呢個「掃帚星宿命」真係唔到你唔信！