Erocky

好，難得有機會，等小弟都講下先~

其實係發生0係好耐之前lu，佢係我ex-gf，
唉，其實果時同佢一齊，都真係几辛苦架，無論精神、同體力（別心邪呀）上～

最麻煩係佢成日幻想 + 無中生有好多野：

1)　成日講野硬係要唔清唔楚，講d又唔講d，係都要留d玄機同隱義，成日都想我估到 + 做到佢既心意……　尤其係成日改ICQ Info，又話我成日點解唔睇，唔去了解佢，其實佢只係寫左幾句不明所以既說話0係Info度，睇完都唔知佢寫乜7，都真係唔想理佢～　舉個例，最鬼記得有一次，佢ICQ Info只係寫著「XXX（她的名字）夢的地球村」几隻字，之後佢問我有無睇佢Info，又問我有乜表示？　咁我當然話有睇但係唔知妳講乜啦～　然後佢就發哂脾氣，又鬧又喊又唔開心，話我一ｄ都唔了解佢……　其實果時我自己都唔知衰乜？？　……之後，原來答案係，佢0係台灣奇摩（Yahoo）那兒申請左個Geocities既account，自己整左個webpage，放左自己幾篇文章上去……　而其中一篇文章內文提及：「要珍惜眼前愛人，記緊要在看完該文章後立刻對她／他說『我愛您』！」　……原來Geocities既中文譯名為「地球村」，所以按照佢既「指示」，我應該要去佢個網頁睇哂佢ｄ文章、然後仲要立刻對住佢講「我愛您」……　當然，最後我既結局係又哎又西，好辛苦先乙水番佢啦……　呢次故事告訴我以後要醒目ｄ，要深思佢有意或者係無意間既每一句每一字內既玄機……

2)　佢疑心的确好大，令到我好辛苦。　有次同佢講開我鍾意陳奕迅某隻歌──兄妹，咁其實都只係因為首歌旋律動聽而鍾意0者～　然後佢聽我咁講後，佢就好唔開心，咁我又要扭盡六壬去乙水番佢啦……　其實又唔係衰乜？　……之后，原來佢係懷疑我鍾意兄妹呢隻歌，係咪因為覺得我同佢之間所追求既只係一種兄妹間既愛，而唔係戀人間既愛？　以為我想向佢憑歌詞寄意～　……咁我當然係俾佢吹脹哂啦～　咁都俾佢諗到～　……根本都無ｄ咁既事。　又有次我去跑步，咁我去跑步一向都唔帶電話架嘛，咁果次我落左去一個鐘，之後我返屋企見到個手提Miss左佢几個call，咁我之後打番俾佢，佢又發哂脾氣咁問我去左邊度，咁我當然如實話去跑步啦，佢又唔信，又問我係咪出去偷食？　……咁我都真係無哂佢符，呢次故事告訴我千祈唔好揀ｄ以悲情為題既歌做最鍾意既歌、同埋去跑步不如真係去偷食仲好，反正都係俾人屈～～（笑）

3)　成日都要傾通宵電話，一唔傾就話我唔俾時間陪佢。　嘩，大佬，我要返工搵食架，唔返工邊有＄同妳去玩呀？　於是我就同佢深入剖釋一下「通宵談電話與工作職康健」既相互關係，點解講唔夠十句，佢就鬧我：「係唔係傾下電話都唔得先，累？　同你自己ｄfriend出夜街就話得，同我傾夜ｄ就話累！」　……唉，大佬，都唔係夜ｄ架喇，係傾到晨早5、6點，恰多一粒鐘去返工架喇……　成日都話阿邊個邊個friend個男朋友都係咁嫁啦，日日傾到好夜，無論個人幾累，只要同女朋友傾電話、聽到佢把聲就可以叉番電喎～ 咁樣訓一個鐘都可以好精神～～　……結果我晚晚都要傾通宵電話，但係電量永遠都係持續既耗盡既水平……　呢次故事告訴我原來人是可以不透過睡覺，利用傾通宵電話黎叉電……

4)　有一次，大家0係坐響公園度講笑，搵自己既ex-bf / ex-gf黎吹水，咁我見佢都話無乜所謂、同埋佢自己又講佢以前同ex拍拖ｄ野，咁我咪不虞有詐咁「敞開心靡」講下囉～　點知唔講由自可，一講佢就發哂火，又話我講咁多ex既野，「即係個心仲掛著人地啦，咁你以後唔洗搵我喇，搵佢咪得囉！」　當然我只係可以用「狗血淋頭」呢形容自己俾佢鬧既情況……　大佬呀，又係妳發起話講、妳又話聽到都無所謂，但係之後妳又發脾氣話我仲同ex有來往……　唉，神又係妳、鬼又係妳，真係俾妳玩殘～　呢次故事告訴我以後要知道只係「有佢講、無我講」既道理；同埋0係任何情況之下，即使受到任何利誘，都唔可以講ex既野出黎……

暫時分享著咁多先啦～
我同佢經過好多次問題、同埋談判破列後，都係無疾而終咁分左手……

其實呢ｄ「騎喱」野，我諗好多brother都試過，一定唔會只係我先遇到，
可能呢ｄ女人野真係好平常，或者只係我水皮，先頂唔順0者……

難得呢次有機會抒發一下，
真的感謝各位brother耐心看我的牢騷～

不過，是牢騷也好；
是笑話也好罷，

也都是前塵啊～～～ ^_^

Erocky

Originally posted by 遊戲 at 2006-2-14 08:29 PM:

哈哈哈

你ex-girl fd當時幾多歲

她當時22, 23歲~
當時我也只是大他一年吧~

這個歲數的女孩子仍是有這種想法，
或許還是很正常吧~